म. टा. वृत्तसेवा, ठाणे
भिवंडीतील खारबाव रेतीबंदर येथे ठाणे ग्रामीण पोलिसांनी अचानक छापा टाकून रेती चोरी करणाऱ्याविरुद्ध कारवाई केली. यावेळी मुद्देमालही जप्त करण्यात आला असून भिवंडी तालुका पोलिस ठाण्यात गुन्हा दाखल करण्यात आला आहे.
खारबाव रेतीबंदर येथे विनापरवाना रेतीउपसा करून वाहतूक करण्यात येत असून यावर कारवाई करण्यासाठी ग्रामीण पोलिसांचे एक पथक निर्माण करण्यात आले आहे. या पथकाने सोमवारी दुपारी याठिकाणी छापा टाकला. यावेळी दोन ट्रकची तपासणी केली असता हे ट्रक रेतीने भरलेले होते. याबाबत चालक आणि मालकाकडे केलेल्या चौकशीत त्यांच्याकडे कोणताही परवाना नसल्याचे आढळून आले. आरोपींनी दहा हजार रुपये किंमतीची दोन ब्रास रेतीचा अनधिकृत उपसा केला आहे. तसेच शासनाचा करही बुडवला आहे.