म. टा. विशेष प्रतिनिधी, ठाणे
गणेशोत्सव आणि मोहरम हे दोन सण एकत्र असल्याने पोलिसांनी कडेकोट बंदोबस्त तैनात केला होता. भिवंडीत सतर्कतेचे आदेश होते. अजमेर नगर मशिद येथे नेमलेल्या बंदोबस्तावर गैरहजर राहणारा नारपोली पोलिस ठाण्याचा हवालदार शिवदास पाटील याने काल्हेर चौकीत खुर्च्यांची तोडफोड करत सहकाऱ्यांना शिविगाळ केली. ही सर्व कृत्य नशेत केल्याचा ठपका ठेवत उपायुक्त अंकित गोयल यांनी शिवदार पाटीलला निलंबित केले आहे. पाटील याच्या रक्ताचे नमुने तपासणीसाठी पाठविण्यात आले असून तो अहवाल आल्यानंतर नशेबाबतची ठोस माहिती मिळू शकेल, असे पोलिसांकडून सांगण्यात आले.
ठाणे पोलिस आयुक्तालयाच्या हद्दीतील भिवंडी हा संवेदनशील भाग आहे. हिंदू आणि मुस्लिम बांधवांचे सण एकत्र आल्याने त्या भागात कोणताही अनुचित प्रकार घडू नये, यासाठी चोख पोलिस बंदोबस्त तैनात करण्यात आला होता. १८ सप्टेंबर रोजी शिवदास पाटील हा शिल्पा चौक काल्हेर येथे पडला होता. सागर भोईर या स्थानिक व्यक्तीने पाटीलला आशा रुग्णालय येथे उपचारांसाठी दाखल केले होते. त्याबाबतची माहिती मिळाल्यानंतर पोलिस रुग्णालयात दाखल झाले. पाटील याच्या उजव्या हाताला मार लागल्याचे आणि नशेच्या अंमलाखाली असल्याचे निदर्शनास आले होते. त्यावेळी पाटील काहीही ऐकण्याच्या मनस्थितीत नव्हता. पोलिस अधिकारी आणि कर्मचाऱ्यांना शिविगाळ करत काल्हेर पोलिस चौकीतील खुर्च्यांचीसुद्धा त्याने तोडफोड केली होती. त्यामुळे इंदिरा गांधी रुग्णालयात पाटील याची वैद्यकीय तपासणी करून रक्ताचा नमुना तपासणीसाठी लॅबमध्ये पाठविण्यात आला आहे. शिवदास पाटील याच्या गैरकृत्यांबाबत वरिष्ठांकडे तक्रार दाखल झाल्यानंतर पोलिस उपायुक्त अंकित गोयल यांनी त्याबाबतची सविस्तर माहिती घेतली. प्राथमिक चौकशीत पाटील दोषी आढळल्याने त्याला पोलिस सेवेतून निलंबित करण्याचे आदेश गोयल यांनी दिले आहेत.