म. टा. वृत्तसेवा, ठाणे
शेठ बिल्डर्सककडून फ्लॅट आणि लाखो रुपयांची मागणी करून काही रक्कम खंडणीच्या स्वरूपात घेतल्याप्रकरणी दाखल गुन्ह्यात माजी नगरसेवकासह तिघांना ठाणे न्यायालयाने १९ नोव्हेंबरपर्यंत पोलिस कोठडी सुनावली आहे.
वर्तकनगर पोलिस ठाण्यात हा गुन्हा दाखल असून माजी नगरसेवक सुधीर बर्गे, राजकुमार यादव आणि प्रदीप पाटील या तिघांना गुरुवारी ठाणे खंडणीविरोधी पथकाने ठाणे मध्यवर्ती कारागृहातून ताब्यात घेतले होते. शुक्रवारी ठाणे न्यायालयात हजर करण्यात आले. आरोपींकडून खंडणीची रक्कम हस्तगत करायची असून आणखी कोणाकडून खंडणी उकळली आहे का, तसेच आरोपींच्या गुंतवणुकीविषयीची चौकशी करायची असल्याची बाब पोलिस अधिकाऱ्यांनी न्यायालयापुढे मांडली. त्यामुळे आरोपींना पोलिस कोठडी द्यावी, अशी मागणी पोलिसांनी केल्यानंतर न्यायालयाने आरोपींना पोलिस कोठडी दिली.