मुलांना संभाव्य धोका सांगा

‘ब्लू व्हेल’बाबत ठाणे पोलिसांच्या मार्गदर्शक सूचना

म. टा. वृत्तसेवा, ठाणे

‘ब्लू व्हेल चॅलेंज’ हा ऑनलाइन गेम तरुणांच्या जीवावर उठल्याने भारतासह जगभरात चिंतेचे वातावरण आहे. या गेमबाबत विशेषकरून पालकांनी कोणती खबरदारी घ्यावी, याविषयी ठाणे पोलिसांनी काही मार्गदर्शक सूचना जारी केल्या आहेत. मुलांच्या बदलणाऱ्या हावभावावर लक्ष ठेवून त्यांच्याशी संवाद साधा, मुलांना गेममधील संभाव्य धोक्याची माहिती द्या, आदी सूचना केल्या आहेत. शिक्षकांनीही शाळेत जनजागृतीपर कार्यक्रम घ्यावेत, असेही पोलिसांनी आवाहन केले आहे.

‘ब्लू व्हेल चॅलेंज गेम’ जगभर पसरला असून हा गेम खेळता-खेळता आत्महत्येच्या घटनाही घडू लागल्या आहेत. मृत्यूच्या दाढेत ओढणाऱ्या या गेममुळे जगभरात खळबळ उडाली आहे. या गेमची व्याप्ती वाढू नये, यासाठी इंटरनेट सुविधा पुरवणाऱ्या कंपन्यांना गेमवर बंदी आणण्याच्या सूचना देण्यात आल्या आहेत. मात्र हा गेम कोणत्याही अॅपवर उपलब्ध नाही. केवळ ठराविक ग्रुपमध्ये शेअर होत असल्याने या गेमवर पूर्णपणे बंदी आणणे कठीण असल्याचे सांगितले जात आहे. सध्या हा गेम वेगवेगळ्या नावाने उपलब्ध असून अनेकदा गेम पूर्ण करण्यासाठी ब्लॅकमेलही केले जाते. त्यामुळे हा गेम तरुणाईसाठी खूपच धोक्याचा ठरू लागला आहे. झोप उडवणाऱ्या या गेमबाबत मार्गदर्शक सूचना पोलिसांकडून दिल्या जाऊ लागल्या आहेत. ठाणे पोलिसांनीदेखील पालकांनी कोणती दक्षता घ्यावी, याबाबत काही सूचना केल्या आहेत.

मुलांचा एकलकोंडेपणा, चिडचिड, अभ्यासातील दुर्लक्ष, मार्कांतील घसरण याकडे दुर्लक्ष करू नका. तसेच मुलांच्या इंटरनेट अॅक्टिव्हिटीवर लक्ष ठेवण्याची सूचनाही केली आहे. तंत्रज्ञानामध्ये होणाऱ्या बदलांची माहिती द्या, मुले कोणत्या प्रकारच्या वेबसाइट सर्च करतात, याची माहिती घ्या, मुले घरातील कम्प्युटरवरूनच इंटरनेटचा वापर करतात ना, याची खात्री करून घ्या, मुलांशी सतत संवाद साधा आणि त्यांच्यासोबत ऑनलाइन इंटरनेट सर्फिंग करा, मुलांसाठी आदर्श पालक बना, इतर पालकांसोबत चर्चा करा आदी सूचना पोलिसांनी पालकांना केल्या आहेत.

शिक्षकांना सूचना…

मुलांच्या सामाजिक वर्तनामध्ये अचानक झालेल्या बदलांवर लक्ष ठेवणे

संशयास्पद बदलावरही लक्ष ठेवणे

शाळांमध्ये ई-गॅझेट्सच्या वापरावर निर्बंध घालणे