एसटीमुळे प्रदूषणात भर

म. टा. वृत्तसेवा, पालघर

सर्वसामान्यांची जीवनवाहिनी समजल्या जाणाऱ्या एसटीमुळे प्रदूषण वाढत असून आदिवासी ग्रामीण भागातील जव्हार आगारामधील बसची दुरवस्था झाली आहे. जव्हार शहराचे दळणवळणाचे प्रमुख साधन महाराष्ट्र राज्य परिवहन विभागाची एसटी असली तरी अनेक बस नादुरुस्त आहेत. त्यातून मोठ्या प्रमाणात काळा धूर निघत असून या बसची पीयूसीही केली जात नाही. या बस भंगारात काढून नवीन बस आणाव्यात, अशी मागणी प्रवाशांकडून केली जात आहे.

बसमधील अनेक आसने तुटलेली असतात. शिवाय खिडक्यांच्या काचा, दरवाजेही तुटलेली आढळतात. स्वच्छतेच्या बाबत तर फारच दुर्लक्ष होत आहे. बसची दुरुस्ती करून ग्राहकांना त्रास होणार नाही, याची काळजी घ्यावी, अशी मागणीही येथील प्रवासी करीत आहे. शहरात गजबजलेल्या ठिकाणी रहदारी अधिक प्रमाणात असल्याने एसटी बस चालताना प्रचंड प्रमणात धूर बाहेर पडून नागरिकांना प्रदूषणाचा त्रास होतो. यामुळे आजारांना निमंत्रणच मिळत आहे. यावर तोडगा काढण्याची मागणीही प्रवासी करत आहेत.