म्हात्रे हत्येआधी आरोपींचा सराव

इस्टेट एजंटच्या ऑफिसमध्ये शिजला हत्येचा कट

म. टा. वृत्तसेवा, ठाणे

भिवंडी महापालिकेतील काँग्रेसचे सभागृह नेते मनोज म्हात्रे यांच्या हत्याप्रकरणी ठाणे खंडणीविरोधी पथकाने इस्टेट एजंटसह चौघांना अटक केली आहे. आरोपींच्या चौकशीत धक्कादायक माहिती समोर आली असून हत्याकांडाचा कट इस्टेट एजंटच्या कार्यालयात शिजला होता. शिवाय हत्या करण्यापूर्वी आरोपींनी गोळीबाराचा सराव केला होता. त्यानंतर म्हात्रे यांची निर्घृण हत्या केल्याचे पोलिस सूत्रांनी सांगितले.

गणेश गोपीनाथ पाटील (३०, कालवर भिवंडी), बुमबुम उर्फ शंकर वीरेंद्रनारायण झा (३८, अंजूर भिवंडी), विशू उर्फ विश्वपाल बाळाराम पाटील (२९ भिवंडी) आणि विद्धेश सुदाम पाटील (३७ भिवंडी) अशी या आरोपींची नावे आहेत. न्यायालयाने त्यांना १६ मार्च अर्थात १४ दिवसाची पोलिस कस्टडी सुनावली आहे. यापूर्वी मनोज म्हात्रे यांच्या अंगरक्षकासह तिघांना अटक केली आहे. त्यामुळे आरोपींची संख्या सहावर गेली आहे. विद्धेश पाटील हा इस्टेट एजंट असून भिवंडी खारबाव येथे साइराज इंटरप्रायजेस नावाचे कार्यालय आहे. याच कार्यालयात म्हात्रे यांच्या हत्येचा कट रचण्यात आला. सर्व आरोपी एकत्र याठिकाणी जमून मद्यप्राशन करत बसले होते. हत्यारेही याठिकाणी मागवण्यात आली होती. हा हत्याकांडातील प्रमुख आरोपी प्रशांत म्हात्रे हाही उपस्थित होता.

हत्येचा कट रचल्यानंतर आरोपींनी याच परिसरातील कंपाऊंडमध्ये पत्र्यावर गोळीबाराचा सराव केला. हत्येच्या दिवशी दुपारी अडीच वाजण्याच्या सुमारास आरोपी मनोज म्हात्रे यांना मारण्यासाठी त्यांच्या कार्यालयाजवळ गेले होते. मात्र म्हात्रे कार्यालयात नसल्याने परत सर्वजण इस्टेट एजंटच्या कार्यालयावर जमले. त्यानंतर म्हात्रे यांचा अंगरक्षक जिग्नेश पटेल याला देखील दारू पिण्यासाठी बोलावले होते. रात्री म्हात्रे यांची हत्या केल्यानंतर प्रशांत म्हात्रे हा सफारी गाडीने तर अन्य सहा हल्लेखोर रिटज कारने फरार झाले होते. रिट्झ कार आरोपी शिवपाल चालवत होता, अशी माहिती पोलिस तपासात समोर आले आहे.

विद्धेश यांच्याकडे शंकर झा कामाला होता. तसेच झा एलआयसीची कामे करत असून गणेश हा म्हात्रे यांच्या संपूर्ण हालचालीवर लक्ष ठेवून होता, असेही पोलिस सूत्रांनी सांगितले. रिट्झ गाडी अगोदरच हस्तगत करण्यात आली असून सफारी गाडी मानपाडा येथे लपवून ठेवली होती. ही गाडीही जप्त केली जाणार आहे.