खासगी बसची वाहतूक बंद

आरटीओ आणि वाहतूक शाखेच्या कारवाईचा बस चालकांकडून धसका

म. टा. प्रतिनिधी, ठाणे

अवैध प्रवासी वाहतुकीविरोधात ठाणे प्रादेशिक परिवहन विभाग आणि वाहतूक शाखेकडून केल्या जाणाऱ्या कारवाईचा धसका घेत ठाण्यातील खासगी बसची वाहतूक बुधवारी दिवसभर बंद होती. आधीच कोपरी संघर्ष समितीने खासगी बसविरोधात घेतलेली ताठर भूमिका आणि प्रशासनाची कारवाई यामुळे रस्त्यावरून गायब झालेल्या खासगी बसपायी सर्व्हिस रोडसह कोपरी परिसरात शुकशुकाट होता.

कोपरी येथे खासगी बसने वृद्धाला धडक दिल्यानंतर या भागातील अवैध प्रवासी वाहतूक करणाऱ्या बसेस स्वामी विवेकानंद चौकातून वळसा घालून माघारी फिरत होत्या. मात्र काही दिवसांपूर्वी पुन्हा एकदा कंपनी बस कोपरी भागात सुरू झाल्याने येथील गावदेवी मंदिर भागाला पुन्हा एकदा बजबजपुरीचे स्वरूप प्राप्त झाले होते. तसेच कंपनी बससह सर्व खासगी बस कोपरी बाहेर उभ्या करण्यासाठी ‘कोपरी संघर्ष समिती’नेही कंबर कसलेली असताना मागील दोन दिवसांपासून वाहतूक शाखेने खासगी बसविरोधात सुरू केलेल्या कारवाईचा बडगा तीव्र केल्याने घोडबंदर मार्गावर कासारवडवली ते कोपरी मार्गावर धावणाऱ्या सर्व बस बंद ठेवण्यात आल्या होत्या. त्याचवेळी कंपनीच्या खासगी बस मात्र कोपरी येथील गावदेवी मंदिरापर्यंत धावत होत्या.

संबंधित अवैध बसचालकांकडे योग्य कागदपत्र नसल्यास त्यांच्यावर कारवाई करून त्यांना न्यायालयात हजर करण्यात येत आहे. त्यानंतर त्यांना पाच ते सहा हजारापर्यंत दंडही ठोठावण्यात येत आहे. अशाप्रकारे वाहतूक शाखेने आतापर्यंत मागील आठवड्याभरात ३० ते ३५ बसेसवर कारवाईचा बडगा उगारला आहे. दरम्यान, वाहतूक शाखेकडून कारवाई यापुढेही सुरू राहणार असल्याची माहिती वाहतूक शाखेकडून देण्यात आली.