टीएमटीची कोंडी

फुकट्या पोलिसांमुळे १८ कोटी ६० लाखांची थकबाकी

म. टा. विशेष प्रतिनिधी, ठाणे

सर्वार्थाने डबघाईला आलेल्या टीएमटीची कोंडी फुकट्या पोलिसांमुळे अधिकच वाढली आहे. सन २०१० ते १७ या कालावधीतील पोलिस ग्रॅण्टची तब्बल १८ कोटी ६० लाख रुपयांची रक्कम पोलिसांनी थकविली आहे. वारंवार पत्रव्यवहार केल्यानंतर आणि पोलिस महासंचालकांनीसुद्धा ही देणी देण्याबाबतची शिफारस केली असतानाही ती रक्कम टीएमटीला मिळू शकलेली नाही.

टीएमटी बसमध्ये पोलिसांना विनामूल्य प्रवासासाठी सुविधा उपलब्ध करून देण्यात आली आहे. या प्रवासापोटी पोलिस आयुक्त कार्यालयाकडून टीएमटीला पोलिस ग्रॅण्ट दिली जाते. परंतु, हे पैसे मिळवताना टीएमटीला अनंत अडचणींचा सामना करावा लागतो. २००७पासून पोलिसांकडून टीएमटीच्या तिजोरीत या ग्रँण्टपोटीचे पैसे जमा होत नव्हते. त्यानंतर तत्कालीन पोलिस महासंचालक संजीव दयाळ यांना पत्र पाठविल्यानंतर २००७ ते २०१० या कालावधीतील ४ कोटी ८१ लाख रुपये टीएमटीच्या तिजोरीत जमा करण्यात आले होते. त्यावेळी या ग्रॅण्टचे पैसे नियमित अदा करण्याच्या सूचनाही करण्यात आल्या होत्या. मात्र, आजही २०१० ते २०१७ या कालावधीतील ग्रॅण्टपोटीचा एकही पैसा टीएमटीच्या तिजोरीत जमा झालेला नाही. ही थकबाकी १८ कोटी ६० लाख रुपयांच्या घरात गेली आहे. टीएमटीचा वाहतूक विभाग हा निधी मिळविण्यासाठी सातत्याने पाठपुरावा करत आहे. मार्च, २०१८ पर्यंत यापैकी किमान ४ कोटी १३ लाख रुपये टीएमटीच्या तिजोरीत जमा होतील, असे गृहित धरून अर्थसंकल्पात तसे नियोजन करण्यात आले आहे.