रंगला स्वरसोहळा!

रघुनंदन पणशीकर आणि बाळासाहेब प्रधान यांची मैफल

म. टा. वृत्तसेवा, ठाणे

गाजलेल्या नाटकांची प्रसिद्ध नाट्यपदे, संगीतातले विविध ताल, राग, यांची सुरेल मैफल रविवारी डोंबिवलीकरांना ऐकायला मिळाली. निमित्त होते, ‘स्वरांगण’ या संस्थेच्या दहाव्या वर्धापनदिनाचे. या दिनाचे औचित्य साधत संस्थेतर्फे संगीत दिग्दर्शक व गायक पंडित रघुनंदन पणशीकर आणि बाळासाहेब प्रधान यांचा नाट्यपदे व अभंगांच्या सादरीकरणाचा संगीत सोहळ्याचे आयोजन करण्यात आले होते. डों​बिवलीच्या सर्वेश हॉल येथील जाणकार रसिकांच्या गर्दीत ही मैफल रंगली.

प्रधान यांनी राग पुरिया सादर करत मैफलीचा सुरुवात केली. ‘सुघरबना’ या तिलवाडा तालात बोल असलेला ख्याल त्यांनी अत्यंत शिस्तबद्धपणे मांडला. त्यानंतर द्रुतचीज-सपनेमे आया हे तीन तालात सादर केले. संपूर्ण गाणे लयकारीयुक्त होते. त्यात ग्वाल्हेरी गाण्याचा बाज दिसून येत होता. त्यांनी सादर केलेल्या तराणालाही रसिकांची भरभरून दाद मिळाली. पंडित रघुनंदन पणशीकर यांनी अनेक लोकप्रिय नाट्यपदे व अभंग रसिकांच्या उत्स्फूर्त प्रतिसादात सादर केली. पंडित जितेंद्र अभिषेकींचे ‘देवाघरचे ज्ञात कुणाला’ आणि ‘दिन गेले भजनावीण सारे’ या नाट्यपदांसाठी पंडित रघुनंदन पणशीकरांना वन्स मोअरही मिळाला.

बाळासाहेब प्रधान यांनी नाट्यपदे व अभंग सादर करून गंधर्वांची पदेही सादर करत रसिकांची मन जिंकली. विशेषतः जोहार ‘मायबाप जोहार’ व ‘अवघाचि संसार’ने रसिकांना मंत्रमुग्ध केले. अविस्मरणीय झालेल्या या मैफलीत संवादिनीवर वासुदेव रिसबूड व ओंकार दातार, तबल्यावर भरत कामत व उदय परुळकर, ऑर्गन वर मकरंद कुंडले आणि इतर तालवाद्यांवर निखिल कुलकर्णींनी साथसंगत केली तर जास्वंदी सुतावणे यांनी कार्यक्रमाचे सूत्रसंचालन केले.