खड्डे, प्रदूषण, डम्पिंगविरोधात निदर्शने

म. टा. वृत्तसेवा, अंबरनाथ

अंबरनाथ येथील सिटिझन फोरम या सामाजिक संस्थेने शहरातील वालधुनी नदीतील वाढते प्रदूषण, रस्त्यांवर पडलेले खड्डे, डम्पिंगचा प्रश्न तसेच जीन्स कारखानदारांना आमदार डॉ. बालाजी किणीकर पाठीशी घालत असल्याचा आरोप करत शिवाजी चौकात रविवारी जाहीर निदर्शने केली.

अंबरनाथ शहरातील अनेक रस्त्यांवर खड्डे पडल्याने शहरातील नागरिकांना पाठीचे आणि मानेचे विकार झाले आहेत. तसेच या खड्ड्यांमुळे अपघात होण्याचे प्रमाण वाढत आहे. काही अपघातांत नागरिकांचे बळीही गेले आहेत. डम्पिंगच्या धुराने या भागात राहणाऱ्या नागरिकांच्या आरोग्याला धोका निर्माण होत आहे. डम्पिंगमध्ये मृत जनावरे टाकण्यात येतात. यामुळे दुर्गंधी पसरत असून नागरिक त्रस्त झाले आहेत. याविरोधात रविवारी अंबरनाथ सिटिझन फोरमच्या सदस्यांनी शिवाजी चौकात बॅनर लावून निदर्शने केली. नगरपालिका या सर्व समस्यांकडे दुर्लक्ष करत असल्याचा आरोपही करण्यात आला. यात सर्वाधिक चर्चेचा विषय ठरला तो, आमदार डॉ. बालाजी किणीकर यांच्या नावाने लावलेल्या बॅनरवर केलेल्या आरोपांचा. अंबरनाथमधून वाहणाऱ्या वालधुनी नदीत पंधराशे जीन्स कारखान्यांतून घातक केमिकल सोडण्यात येते. त्यामुळे वालधुनी नदीतील जलप्रदूषणाचे प्रमाण वाढत आहे. मात्र यावर एमपीसीबी कारवाई करत असून कारखानदारांना एमपीसीबीने नोटीस पाठवत कारवाईचे आदेश दिले असताना, याविरोधात आमदार डॉ. बालाजी किणीकर यांनी एमबीसीबीला नोटीस मागे घेण्यासंदर्भात पत्र दिले असल्याचे माहितीच्या अधिकारात समोर आल्याचा आरोप सिटिझन फोरमचे सत्यजित बर्मन यांनी केला. आमदार जीन्स कारखानदारांना पाठीशी घालत असल्याचाही आरोप करण्यात आला आहे. या सर्व समस्यांवर सरकारने मार्ग काढावा, अशी मागणी या करण्यात आली.