राष्ट्रवादीकडून आंदोलन

बदलापूर ः गेल्या दोन वर्षांपासून तयार असलेले मात्र सत्ताधारी आणि प्रशासनाच्या अनास्थेमुळे लोकार्पणापासून वंचित असलेल्या प्रकल्पांवरून बदलापूर शहर राष्ट्रवादी काँग्रेस पक्षाने बदलापुरात पालिकेचे श्राद्ध घालून आंदोलन केले. अनोख्या पद्धतीने केलेल्या या आंदोलनाने अनेकांचे लक्ष वेधून घेतले.

बदलापूर शहरात विविध प्रकल्प रखडले आहे. भुयारी गटार योजनेवरून सत्ताधारी भाजपनेच शिवसेनेवर हल्ला केल्याने शिवसेनेची सभागृहात कोंडी झाली होती. तसेच इतर विषयांवरही भाजप काही महिन्यांपासून आक्रमक भूमिका घेत आहेत. त्यात बदलापुरातील दोन वाहनतळे, मच्छी मार्केट, भाजी मार्केट अशा वास्तू तयार होऊन पडून आहेत. मात्र त्यांचा वापर होत नसल्याने नागरिकांना त्याचा काहीच फायदा नाही. या वास्तूंचे लोकार्पण होत नसल्याने बदलापूर शहर राष्ट्रवादी काँग्रेसच्या वतीने मुख्याधिकाऱ्यांना पत्र देण्यात आले होते. दोन महिन्यांत या वास्तूंचे लोकार्पण करा, अन्यथा राष्ट्रवादीतर्फे तीव्र आंदोलन छेडण्यात येईल, असा इशाराही देण्यात आला होता. त्यानंतर कोणतीही कार्यवाही न केल्याने आंदोलनाचे हत्यार उपासण्यात आले.