मानसिक रुग्णाची दीपस्तंभावर चढाई

अग्निशमन दल, पोलिसांच्या प्रयत्नानंतर खाली उतरवण्यात यश

म. टा. वृत्तसेवा, अंबरनाथ
अंबरनाथ पूर्वेकडील स्वामी समर्थ चौक... वेळ शनिवारी रात्री साडेनऊची... नेहमीसारखा परिसर गर्दीने फुललेला... त्यात वाहनांची गर्दी... इतक्यात स्वामी समर्थ चौकाच्या मध्यभागी असलेल्या भव्य २५ फूट उंच दीपपस्तंभावर एक मानसिक रुग्ण असलेली व्यक्ती चढत असल्याचे दिसते आणि बघ्यांच्या भुवया उंचावतात. फोनाफोनी केल्यानंतर अग्निशमन दल आणि पोलिस तातडीने घटनास्थळी धाव घेतात. अखेर अर्धा ते पाऊण तासाच्या अथक प्रयत्नानंतर त्याला खाली उतरवले जाते आणि अनेक जण सुटकेचा श्वास सोडतात. मात्र त्या मानसिक रुग्णाला संतप्त जमावाने चोप दिल्याचीही घटना घडली.

अंबरनाथ शहरातील रस्त्यावर स्थानक परिसरात दोन ते तीन मानसिक रुग्ण जोरजोरात ओरडत, हातवारे करत फिरत असल्याचे दृश्य अंबरनाथकरांना नवे नाही. अनेकांनी या मानसिक रुग्णांकडून काही हानी होण्याची भीतीही व्यक्त केली आहे. या मानसिक रुग्णांनी आतापर्यंत सर्वसामान्यांना आतापर्यंत कधीच त्रास दिलेला नाही. मात्र शनिवारी रात्री साडेनऊ वाजता यापैकी एका मानसिक रुग्ण अंबरनाथ पूर्व भागातील स्वामी समर्थ चौकात उभारलेल्या दीपस्तंभावर चढला आणि एकच धावपळ उडाली. हा रुग्ण दिव्यांना पकडत दीपस्तंभावर चढत होता. हे दृश्य पाहून अनेकजण त्या मानसिक रुग्णाला खाली उतरण्यासाठी विनंती करू लागले, मात्र त्याने प्रतिसाद न दिल्याने अखेर नागरिकांनी अग्निशमन दल आणि पोलिसांशी संपर्क साधला. मात्र तोपर्यंत या ठिकाणी बघ्यांची गर्दी आणि मुख्य रस्ता असल्याने वाहतूककोंडी झाली होती. त्यात त्या रुग्णाने दीपस्तंभावर असलेला त्रिशूळ काढून खाली फेकला. त्यामुळे हा रुग्ण खाली उडी मारतो की काय, अशी भीती वाटली होती. मात्र अग्निशमन दल आणि पोलिसांनी घटनस्थळी धाव घेत, त्याला खाली उतरवण्यासाठी प्रयत्न सुरू केले. त्यात हा रुग्ण अग्निशमन दलाच्या जवान जवळ पोहोचताच त्यालाही धक्का देत होता. त्यामुळे खाली बघ्यांनी त्याच्यासाठी सतरंजी पसरवून अन्य सुरक्षेचे उपायही केले होते. अखेर अग्निशमन दलाचा जवान आणि एका नागरिकाने मागून त्याला पकडले आणि अखेर अर्ध्या तासाच्या प्रयत्नांनंतर त्या मानसिक रुग्णाला खाली उतरवण्यात यश आले. त्यामुळे संतप्त नागरिकांनी तो मानसिक रुग्ण खाली येताच त्याचा चोप दिला. यावेळी चौकात बघ्यांची गर्दी आणि वाहनांची कोंडी झाली होती. यावेळी पोलिसांनी तात्काळ त्याला गर्दीतून बाहेर काढले आणि पोलिस ठाण्यात घेऊन गेले.