दुरुस्तीकाम रखडले

ठाणे : निधीअभावी कामे रखडत असताना दुसरीकडे निधी मिळूनही सार्वजनिक बांधकाम विभागाकडून (पीडब्ल्यूडी) कामे केली जात नसल्याची बाब समोर आली आहे. ठाणे पोलिसांच्या नवीन पोलिस टॉवरमधील पाच इमारतींमध्ये दुरुस्तीच्या कामासाठी तब्बल सहा कोटी ९६ लाख ६७ हजारांचा निधी पीडब्ल्यूडीला देण्यात आला आहे. या कामाबाबत निविदा प्रक्रिया राबवून कंत्राटदाराची नियुक्ती करण्यात आली आहे. परंतु, केवळ 'वर्क ऑर्डर' न मिळाल्याने दुरुस्तीच्या कामास सुरुवात झालेली नाही. लवकरात लवकर दुरुस्तीची कामे करण्याविषयी ठाणे पोलिसांकडून पीडब्ल्यूडीच्या अधिकाऱ्यांकडे वारंवार पाठपुरावा केला जात आहे. बैठकाही झाल्या. तरीही पीडब्ल्यूडीने काम सुरू न केल्याने यामागे नेमके काय गौडबंगाल आहे, याबाबत प्रश्नचिन्ह निर्माण झाले आहे.

नवीन पोलिस टॉवरमध्ये पाच इमारती असून येथील घरांची संख्या २६० आहे. सूर्य, अरुण, आदित्य, रवी, भास्कर अशी येथील इमारतींची नावे असून या वसाहतीमध्ये पोलिस अधिकाऱ्यांसह कर्मचारी वास्तव्य करत आहेत. पोलिस आयुक्त कार्यालयापासून जवळच असणारी ही वसाहत उभी राहून काही वर्षे झाली आहेत. मात्र, वसाहतीमध्ये पाणीगळतीची समस्या निर्माण झाली आहे. घरामध्ये पाणी गळत असल्याने पोलिस कुटुंब त्रस्त आहेत. त्यामुळे तातडीने पाण्याची गळती थांबवणे गरजचे आहे. अन्यथा इमारतीला धोका निर्माण होऊ शकतो. वसाहतीमधील १६० पेक्षाही अधिक घरामध्ये गळतीची समस्या असल्याचे सांगितले जात आहे. शिवाय, इतरही दुरुस्तीची कामे करायची आहेत. इमारतीमध्ये गळती प्रतिबंध उपाययोजना करण्यासह इतरही दुरुस्तीच्या कामासाठी सात कोटी ३४ लाख ९१ हजार ८७० इतक्या अंदाजित खर्चास प्रशासकीय मान्यता मिळण्याबाबत प्रस्ताव सादर करण्यात आला होता. सार्वजनिक बांधकाम विभागाने या अंदाजपत्रकाची तपासणी करून सहा कोटी ९६ लाख ६७ हजार या सुधारित खर्चास २०१९ च्या सप्टेंबर महिन्यात गृह विभागाने काही अटीवर प्रशासकीय मान्यता दिली होती. त्यानंतर दुरुस्तीच्या कामासाठी पोलिस विभागाने या रकमेचा धनादेश २० ऑक्टोबर २०२० रोजी पीडब्ल्यूडीला दिला आणि पीडब्ल्यूडीने निविदा प्रक्रिया राबवली. निविदा २१ जानेवारी रोजी उघडल्यानंतर नियमानुसार दुरुस्तीचे कंत्राट एका कंपनीला मिळाले. २४ टक्के कमी दराने कंत्राट या कंपनीला मिळाले असून निविदाबाबत सर्व प्रक्रिया पार पडलेल्या आहेत. कंत्राटदाराने इसारा रक्कमही भरली असल्याचे सांगितले जात आहे.

निविदा प्रक्रिया राबवूनही अद्याप दुरुस्तीच्या कामाला सुरुवात केली नाही. 'वर्क ऑर्डर' नसल्याने दुरुस्तीचे काम रखडल्याचे ठाणे पोलिसांकडून सांगितले जात आहे. मात्र, पीडब्ल्यूडी 'वर्क ऑर्डर' का देत नाही, याबाबतही मोठे गौडबंगाल असल्याचे बोलले जात आहे. दुरुस्तीचे काम रखडल्याने इमारतीमध्ये राहणाऱ्या पोलिस कुटुंबांना पाणी गळतीचा मोठा मनस्ताप होऊ लागत आहे. तातडीने दुरुस्तीचे काम होणे आवश्यक असूनही काम करण्याकडे पीडब्ल्यूडी विभाग दुर्लक्ष करत आहेत.

मुहूर्त कधी?

पाणी गळतीविषयी येथील रहिवाशी दररोज तक्रारी पोलिस विभागाकडे करत आहेत. विशेष म्हणजे पीडब्ल्यूडीच्या अधिकाऱ्यांनी वसाहतीची पाहणीदेखील केली. मात्र केवळ पाहणी करून जातात. पुढे काहीच कार्यवाही होत नाही. काम सुरू करण्याबाबत ठाणे पोलिस दलाकडून सातत्याने पत्रव्यवहार केला जात आहे. पीडब्ल्यूडीच्या अधिकाऱ्यांसोबत बैठकही झाली आहे. तरीही इमारतीच्या दुरुस्तीच्या कामास मुहूर्त मिळेनासा झाला आहे.