पित्यापाठोपाठ मायलेकींचाही मृत्यू

म. टा. वृत्तसेवा, ठाणे

सिलिंडर स्फोटात मुलीला वाचविण्यासाठी जीवाची पर्वा न करता धावलेल्या वडिलांच्या मृत्यूपाठोपाठ मुलगी प्रीती आणि आई दर्शना यांचीही मृत्यूशी झुंज अखेर अपयशी ठरली. वाशे येथील कृष्णाई रुग्णालयात प्रीती (१९) यांनी मंगळवारी रात्री तर दर्शना (४५) यांनी बुधवारी सकाळी अखेरचा श्वास घेतल्याने जाधव कुटुंबातील दीप्ती जाधव यांच्यावर दुःखाचा डोंगर कोसळला आहे.

राधाबाई चाळीत राहणाऱ्या जाधव कुटुंबीयांच्या घरात सिलिंडर स्फोट झाला होता. त्यावेळी कुटुंबीय घराबाहेर पडले, मात्र प्रीती अडकल्याचे समजताच वडील दगडू जाधव यांनी आगीशी सामना करत तिला बाहेर आणले होते. त्यानंतर चौघांना सिव्हिल रुग्णालयात दाखल केले होते. शनिवारी उपचारादरम्यान दगडू जाधव यांचा मृत्यू झाला. त्यानंतर दोन मुली आणि आई या दोघींना नातेवाईकांनी कृष्णाई रुग्णालयात हलविले, मात्र दर्शना आणि प्रीती यांच्या शरीरांतर्गत मोठी जखम झाली होती. आगीचा धूर तोंडावाटे फुफ्फुसात गेल्याने फुफ्फुसे निकामी झाली होती. त्यामुळे दोघींनाही श्वसनास त्रास होत होता. मंगळवारी रात्री साडेसातच्या दरम्यान प्रीती यांनी अखेरचा श्वास घेतला, त्यानंतर रात्री दर्शना यांची प्रकृती अधिक गंभीर झाली आणि बुधवारी सकाळी त्यांचाही मृत्यू झाला. दीप्ती यांच्यावर सध्या उपचार सुरू असून त्यांची प्रकृती स्थिर आहे.

...

बहिणीचा सांभाळ करणार

या धक्कादायक घटनेतून सावरण्याचा प्रयत्न करत आहे. मोठी बहीण दीप्तीचे उपचार झाल्यानंतर त्यांचा सांभाळ करणार आहे.

तृप्ती जाधव, दर्शना यांची मुलगी