राज्यात पावसाचा जोर ओसरणार, तापमान वाढणार

ठाणे:

सध्या राज्यात मान्सून सक्रिय असून बऱ्याच भागात पावसाने हजेरी लावली आहे. मात्र, १८ जुलैपासून राज्यात पावसाचा जोर कमी होण्यास सुरुवात होईल, असा अंदाज हवामान तज्ज्ञांनी व्यक्त केला आहे.

येत्या २३ जुलैपर्यंत विदर्भ, मराठवाडा आणि मध्य महाराष्ट्राच्या काही भागांत हलक्या सरी कोसळतील. २३ ते २५ जुलैमध्ये विदर्भात पुन्हा एकदा पावसाच्या प्रमाणात वाढ होण्याची शक्यता आहे. त्यानंतर राज्यातील बऱ्याच भागातील पावसात दीर्घकालीन खंड पडण्याचे संकेत हवामान तज्ज्ञांनी दिले आहेत. कोकण आणि मुंबई परिसरात देखील या आठवड्यात पावसाचा जोर कमी राहील. पावसाचे प्रमाण कमी होणार असल्यामुळं कमाल तापमानात वाढ होण्याची शक्यता आहे. शेतकऱ्यांनी हवामानाच्या या स्थितीनुसार शेतीचे नियोजन करावे, असे आवाहन कृषी विभागाकडून करण्यात आले आहे.