म. टा. वृत्तसेवा, वसई
'आवारा', 'जागते रहो', 'तिसरी कसम', 'संगम', 'जिस देशमें गंगा बहती है' अशा विविध हिंदी चित्रपटांतील गाण्यांची मैफल विरारमध्ये रंगली होती. निमित्त होते ते साहित्य चावडीचे. यावेळी चावडीवर अभिनेते राज कपूर यांच्या विशेष गीतांची बरसात झाली.
यंग स्टार्स ट्रस्ट, विरार या संस्थेच्या वतीने विवा कॉलेजमध्ये ही साहित्य चावडी भरली होती. यावेळी गायक कलावंत दिलीप पांड्ये यांनी सरपंचपद भूषवले. ज्येष्ठ अभिनेते आणि दिग्दर्शक राज कपूर यांच्या चित्रपटांतील गीतगायन हाच या चावडीवरील एकमेव विषय होता. 'आवारा हूँ' हे शीर्षक या राज स्पेशल मैफलीला देण्यात आले होते. कराओके संगीताच्या साथीने झालेल्या या कार्यक्रमात एकूण २५ निवडक गायकांच्या विविध गाण्यांमुळे ही मैफल चांगलीच रंगली. गायक कलावंत दिलीप पांड्ये, रोहा ढाके, चंद्रकांत सोनवणे, ज्योती मुदलीयार, संजय भावसार, अॅड.रमाकांत वाघचौडे आदींनी सादर केलेल्या गाण्यांना उपस्थित रसिकांची दाद मिळाली.
'संगम' मधील 'ओ मेरे सनम ओ मेरे सनम, दो जिस्म मगर एक जान है हम' हे द्वंद्वगीत दिलीप पांड्ये आणि रोहा ढाके यांनी इतके छान गायले की रसिकांनी 'वन्स मोअर' असा प्रतिसाद दिला. सहभागी गायकांनी आवारा, जागते रहो, तिसरी कसम, संगम, जिस देशमे गंगा बहती है, मेरा नाम जोकर, अनाडी, श्री ४२०, कल आज और कल, परवरीश, अराऊंड द वर्ल्ड, या गाजलेल्या चित्रपटांमधील गीते सादर केली. साहित्य चावडी उपक्रमाच्या पदाधिकारी कवयित्री व नगरसेविका सुरेखा कुरकुरे यांनी उपस्थितांचे स्वागत केले. ज्येष्ठ नगरसेविका व लेखिका डॉ. भारती देशमुख, संगीतकार संदीप फाटक, अॅड. नयन जैन, नाट्यनिर्मात्या कल्पिता तळपदे, अभिनेते संजय चव्हाण, सुषमा कोल्हे, गौरी संख्ये माजी नगरसेवक बी. एन. गमरे, प्रा. परांजपे आदी यावेळी उपस्थित होते. प्रा. विजय उमर्जी यांनी या कार्यक्रमाचे सूत्रसंचालन व आभार प्रदर्शन केले.