रजनी पंडित कारागृहातून बाहेर

सीडीआरबाबत लवकरच बोलणार

म. टा. वृत्तसेवा, ठाणे

बेकायदा कॉल डिटेल्स रेकॉर्ड (सीडीआर) प्रकरणात ठाणे सत्र न्यायालयाने दिलेल्या जामिनानंतर अखेर ३२ दिवसानंतर भारतातील पहिल्या महिला खासगी गुप्तहेर रजनी पंडित यांची बुधवारी ठाणे कारागृहात सुटका झाली. कारागृहातून बाहेर आल्यानंतर जे नशिबात होते झाले. रामालाही वनवास भोगावा लागला होता. राजा हरिश्चंद्रालाही पाणी भरावे लागले होते. सीडीआरबाबत मी लवकरच बोलणार असल्याचे पंडित यांनी सांगितले.

बेकायदा सीडीआर विक्रीमध्ये ठाणे गुन्हे शाखा युनिट एकने आरोपींना अटक केल्यानंतर चौकशीत रजनी पंडित यांचे नाव समोर आले होते. त्यांनीही सीडीआर विकत घेतले होते. त्यानंतर गुन्हे शाखेने २ फेब्रुवारी रोजी पंडित यांना अटक केली होती. सुरुवातीला न्यायालयाने पोलिस कोठडी दिली होती. मात्र नंतर त्यांची न्यायालयीन कोठडीत रवानगी करण्यात आल्यानंतर ११ फेबुवारीपासून त्यांचा मुक्काम ठाणे मध्यवर्ती कारागृहातच होता. जामिनासाठी त्यांनी न्यायालयात अर्जही केला होता. मात्र सुरुवातीला जामीन अर्ज फेटाळल्यानंतर ठाणे सत्र न्यायालयात धाव घेतली. मात्र, न्यायालयाने दिलासा देत सोमवारी पंडित यांना जामीन मंजूर केल्याने त्यांची बुधवारी ठाणे कारागृहातून मुक्तता करण्यात आली. कारागृहातून बाहेर आल्यानंतर त्यांनी पत्रकारांशी संवादही साधला. अभिनेता नवाझुद्दीन सिद्दिकीविषयी त्यांना विचारल्यानंतर त्याचा माझ्याकडे नंबरही नसल्याचे त्या म्हणाल्या. आपली तब्येत ठीक नसल्याचेही यावेळी त्यांनी सांगितले. पोलिस त्यांचे काम करत आहेत. मात्र सीडीआर प्रकरणाबाबत मी लवकरच पत्रकार परिषद घेऊन बोलणार असल्याचेही पंडित म्हणाल्या.