प्राचार्यांकडे मागितली दोन लाखांची खंडणी

शहापूर : शहापूर तालुक्यातील अघई येथील आत्मामलिक आंतरराष्ट्रीय स्कूलचे पालक-शिक्षक समितीचे अध्यक्ष शैलेश निमसे यांनीच या शाळेचे प्राचार्य शिवम भट यांच्याकडे दोन लाखांची खंडणी मागितल्याने तालुक्यात एकच खळबळ उडाली आहे. याबाबत शहापूर पोलिस ठाण्यात निमसे याच्याविरुद्ध गुन्हा दाखल करण्यात आला आहे.

याबाबत शहापूर पोलिसांनी दिलेल्या माहितीनुसार, प्राचार्य शिवम देशराज भट हे शाळेतील त्यांच्या दालनात बसले असता निमसे प्राचार्यांच्या दालनात आले. शाळेत काय सुरू आहे मला माहित आहे, माझ्या मुलाकडून फी मागायची नाही, अशी धमकी देत त्यांनी खुर्च्यांची मोडतोड केली व कागदपत्रे अस्ताव्यस्त फेकून दिली. निमसे यांनी प्राचार्यांना शिवीगाळ, दमदाटी व मारहाण केली. जिवे ठार मारण्याची धमकी देऊन दोन लाखांची मागणी केली, अशी माहिती शहापूर पोलिसांनी दिली. याबाबत प्राचार्य भट यांनी शहापूर पोलिस ठाण्यात तक्रार दाखल केल्यानंतर पोलिसांनी निमसे याचा शोध घेतला असता तो फरार असल्याचे सहाय्यक पोलिस निरीक्षक गजेंद्र पालवे यांनी सांगितले. दरम्यान, शिवसेनेचे तालुकाप्रमुख मारुती धिर्डे यांच्याशी मोबाइलवरून संपर्क साधला असता शैलेश निमसे याला सहा महिन्यांपूर्वीच शिवसेनेतून काढून टाकल्याची माहिती त्यांनी दिली.