भाजप नगरसेवकावर बलात्काराचा गुन्हा

दया गायकवाडविरोधात तरुणीची तक्रार

म. टा. वृत्तसेवा, कल्याण

कल्याण-डोंबिवली महापालिकेतील भाजप नगरसेवक दया गायकवाड याच्याविरोधात बलात्कार केल्याची तक्रार ठाण्यातील तरुणीने केल्यानंतर सोमवारी याप्रकरणी गुन्हा दाखल करण्यात आला आहे.

ठाण्यात राहणाऱ्या एका तरुणीने काही दिवसांपूर्वी गायकवाड याच्यावर बलात्काराचा आरोप करत पोलिस आयुक्तांकडे तक्रार केली होती. गायकवाडने आपल्याशी फेसबुकवर मैत्री करत लग्नाचे आमिष दाखवून एप्रिल ते ऑगस्टदरम्यान बलात्कार केल्याचे या तक्रारीत नमूद केले होते. गायकवाडला संपर्क साधण्याचा प्रयत्न केला तेव्हा त्याच्या पत्नीने फोन उचलून आपल्याला शिवीगाळ केली. मात्र त्याच्याशी लग्न करायचे असल्यामुळे अश्विनी धुमाळ या राष्ट्रवादीच्या पदाधिकाऱ्याकडे याप्रकरणी मी मदत मागितली, असे तिने तक्रारीत नमूद केले आहे. मात्र, धुमाळनेही गायकवाड यांच्याशी संगनमत करून आपल्याला गायकवाड यांच्याकडे पैसे मागण्याचा सल्ला दिला. काही वेळातच घरात आलेल्या गायकवाडकडे धुमाळ यांच्या सांगण्यावरून पैसे मागताच त्याचे रेकॉर्डिंग करत धुमाळ यांच्या घरातच त्याने पुन्हा बलात्कार केल्याचा आरोप या तरुणीने केला आहे. या तक्रारीनंतर सोमवारी रात्री वर्तकनगर पोलिस ठाण्यात भाजप नगरसेवक दया गायकवाड आणि राष्ट्रवादीच्या युवती जिल्हाध्यक्षा अश्विनी धुमाळ आणि त्यांचा पती मनोज धुमाळ यांच्या विरोधात गुन्हा दाखल करण्यात आला आहे. दरम्यान, या सर्व आरोपांचे दया याने खंडन करत हे आरोप खोटे असल्याचे सांगितले.