कुत्रे रोखण्यासाठी लाल रंगाचा प्रयोग

कल्याण ः भटक्या कुत्र्यांच्या जाचातून सुटण्यासाठी नागरकांनीच उपाय शोधले आहेत. सोसायट्याच्या जिन्यावर, आवारात, मंदिरात आणि चाळीमधील मोकळ्या जागेत लाल रंगाच्या पाण्याने भरलेल्या बाटल्या ठेवल्या जातात.

या बाटल्यांमुळे कुत्रे फिरकत नसल्याचे रहिवाशांचे म्हणणे आहे. कल्याण-डोंबिवलीत २३ हजारांपेक्षा जास्त कुत्रे असून या कुत्र्यांची नसबंदी करण्याचे काम दोन वर्षांपासून बंद होते. या काळात भटक्या कुत्र्यांची संख्या वाढल्याने रात्रीच्या वेळी रस्त्याने जाणाऱ्य नागरिकांच्या अंगावर या कुत्र्यांचा कळप चाल करून येतो. कुत्रे रात्रीच्या वेळी इमारतीच्या जिन्यांत ठाण मांडत घाण करतात. त्यामुळे या या कुत्र्यांना हुसकावून लावण्यासाठी लाल पाणी भरलेल्या बाटल्या अतिशय उपयुक्त ठरत असल्याचे नागरिकांचे म्हणणे आहे.