उल्हासनगरचा आदित्य ठाकरेंकडून आढावा

म. टा. वृत्तसेवा, उल्हासनगर

उल्हासनगरमधील करोनाबाबतच्या परिस्थितीचा आढावा घेण्यासाठी शिवसेना युवानेते आणि पर्यावरणमंत्री आदित्य ठाकरे यांनी सोमवारी संध्याकाळी उल्हासनगर महापालिकेला भेट दिली. यावेळी त्यांनी खासदार डॉ. श्रीकांत शिंदे, महापालिका आय़ुक्त, महापौर आणि आरोग्य अधिकाऱ्यांशी सविस्तर चर्चा करत, शहरातील करोनाबाबत माहिती घेतली. भविष्यातील उपाययोजनांबाबत सूचना केल्या. तसेच तेजस ठाकरे यांच्या अंगरक्षकाला करोनाची लागण झाली असली तरी, तेजस यांची प्रकृती उत्तम असल्याचे त्यांनी स्पष्ट केले.

भिवंडी आणि उल्हासनगर शहरातील वाढत्या बाधित रुग्णसंख्येच्या पार्श्वभूमीवर शहरातील करोनाच्या परिस्थितीचा आढावा घेण्यासाठी आदित्य ठाकरे यांनी सोमवारी उल्हासनगर महापालिकेत भेट देत मुख्यालयात आढावा बैठक घेतली. याप्रसंगी मुंबईतील धारावी पॅटर्नच्या धर्तीवर 'मिशन झिरो' अंतर्गत शहरात चाचण्यांची संख्या वाढवणे, करोना संक्रमणाच्या संदर्भात जनजागृती करणे, घरी विलगीकरणात असलेल्या रुग्णांशी सतत संवाद साधून दर तीन दिवसांनी त्यांचा अहवाल सादर करणे, डॉक्टर, परिचारिका तसेच आरोग्यसेवकांचे मनोबल वाढवण्यासाठी प्रयत्न करणे, करोना रुग्णालयात रुग्णांना आवश्यक असणाऱ्या सर्व सोयीसुविधा उपलब्ध करून देणे, यासाठी आयुक्त तसेच वरिष्ठ अधिकाऱ्यांना या बैठकीत ठाकरे यांनी निर्देश दिले. या बैठकीला खासदार डॉ. श्रीकांत शिंदे, आमदार डॉ.बालाजी किणीकर, महापौर लीलाबाई आशान, उल्हासनगर महापालिका आयुक्त डॉ. राजा दयानिधी, भिवंडी महापालिका आयुक्त पंकज आशिया, डॉ. लकडावाला उपस्थित होते.