म. टा. वृत्तसेवा , वसई :
जीवनात आपण केलेली सत्कृत्ये हीच आपली सर्वोत्कृष्ट देणगी आहे. आपल्या जवळची सत्ता, संपत्ती, अधिकार, जमीनजुमला कुणीही हिरावून घेऊ शकतात. मात्र आपण केलेली सत्कृत्ये कुणीही हिरावून घेऊ शकत नाहीत. आपण आजी, आजोबा या नात्याने आयुष्यभर खस्ता खाल्ल्या, हाडाची काडे केली, अथक परिश्रम घेतले, प्रथम आपल्या मुलांचे संगोपन केले आणि आतानातवंडांचे संवर्धन करीत आहात, हीच आपली सत्कृत्ये आहेत. आपण केलेली सत्कृत्ये आयुष्याची संध्याकाळ संपन्न व समृद्ध करते, असे प्रतिपादन संत गोन्सालो गार्सिया हायस्कूलचे प्राचार्य फादर ज्यो आल्मेडा यांनी उमराळे येथे आयोजित कार्यक्रमात केले.
उमराळे येथील सेंट जोसेफ चर्च येथे ज्ञानज्योत संघटना व युवा अभियान उमराळे यांच्यातर्फे 'एक संध्याकाळ आजी आजोबांसमवेत' या कार्यक्रमाचे आयोजन रविवारी सायंकाळी करण्यात आले होते. याप्रसंगी प्रमुख अतिथी म्हणून संत गोन्सालो गार्सिया हायस्कूलचे प्राचार्य फादर ज्यो आल्मेडा तर अध्यक्षस्थानी फातिमा हायस्कूलचे प्राचार्य फादर जोएल पेन उपस्थित होते.
बदलत्या परिस्थितीचा आढावा घेत फादर आल्मेडा यांनी आजी, आजोबा त्यांच्या जीवनातल्या अनेक कथा, व्यथा, वेदना कथन करून वास्तव जीवनाचे दर्शन घडवले. सबुरीचा सल्ला देताना ते म्हणाले की, पूर्वीचा काळ वेगळा होता आज मतलबी मनोवृत्ती वाढत आहे. काळाची पावले ओळखून आजी आजोबांना शहाणे होण्याचा कानमंत्र त्यांनी दिला. अध्यक्षस्थानी असलेले फातिमा हायस्कूलचे प्राचार्य फादर जोएल पेन म्हणाले की, मुलांच्या चेहऱ्यावरून मायेने फिरणारा एकमेव हात म्हणजे आजीआजोबा यांचा स्नेहाळ हात. प्रत्येक घरातील लहान मुलांना प्रेम, माया, ममता, धाक, आधार व संरक्षण आजी आजोबा यांच्या रूपाने मिळते. ज्या घरातील मुलांवर आजी आजोबाचे संस्कार व आशीर्वाद आहेत ते घर सुरक्षित आहे.जागृत आहे.
आजी आजोबांचे प्रतिनिधी म्हणून अॅनी पीटर गोन्सालविस यांचा प्रातिनिधिक सत्कार करण्यात आला. आपले मनोगत व्यक्त करताना पीटर गोन्सालविस म्हणाले की, आजच्या बदलत्या काळात आजी, आजोबा नातवंडांसाठी हिरो व हिरोइन आहेत. आजी, आजोबा म्हणजे फुललेली बाग. त्यांच्या मांडीवर नातवंडे सुरक्षितपणे विसावतात. नातवंडांसाठी आजी, आजोबा म्हणजे अखंड वाहणारा ऊर्जास्रोत आहे, असे ते म्हणाले.