​ घोड्यांना 'ग्लॅण्डर्स'चा धोका

रक्ताचे नमुने चाचणीसाठी हरयाणाला

म. टा. प्रतिनिधी, ठाणे

'ग्लॅण्डर्स' या संसर्गजन्य आजारापायी शहरातील ११ घोड्यांची गुरुवारी जिल्हा पशु वैद्यकीय विभागाकडून चाचणी करण्यात आली. या चाचणीत प्रत्येक घोड्यांच्या रक्ताचे नमुने घेण्यात आले असून हे नमुने पुढील चाचणीसाठी हरयाणा येथील हिसार येथे असणाऱ्या नॅशनल रिसर्च सेंटरमध्ये पाठवण्यात आले आहेत.

ठाणे शहराचे हृदय म्हणून ओळखल्या जाणाऱ्या मासुंदा तलावाला कायमच घोडा गाड्यांचा वेढा पडलेला असतो. याठिकाणी असलेल्या घोडागाड्यांचे बच्चेकंपनीसह मोठ्यांनाही कायम आकर्षण वाटते. मात्र शहराच्या मध्यवर्ती भागात असलेल्या या घोडागाड्यांना जुंपण्यात येणाऱ्या घोड्यांमुळे सर्वसामान्यांना संसर्गजन्य अशा 'ग्लॅण्डर्स' या रोगाची बाधा होऊ नये, म्हणून जिल्हा पशु वैद्यकीय विभागाने येथील ११ घोड्यांच्या रक्ताचे नमुने गोळा केले. याआधीही अशाच प्रकारे या घोड्यांच्या रक्ताचे नमुने घेण्यात आले होते. या प्राथमिक चाचणीत संबंधित घोड्यांपैकी एकाला या आजाराची लागण झाल्याची शक्यता वर्तवण्यात आली होती. त्यामुळे पुन्हा एकदा घेण्यात आलेल्या नव्या चाचणीतून येणाऱ्या अहवालानंतर संबंधित घोड्याला हा आजार झाला आहे का, याबाबत खुलासा होणार आहे. दरम्यान, या चाचणीचा अहवाल आल्यानंतर या घोड्याला हा आजार झाला असल्यास त्याला इतर घोड्यांपासून दूर ठेवण्यात येणार असून यामध्ये त्याचा मृत्यू होणे निश्चित आहे. त्यामुळे त्याला इतर घोड्यांपासून वेगळे ठेवण्यात येणार असल्याचे ठाणे जिल्हा पशु वैद्यकीय विभागाकडून स्पष्ट करण्यात आले आहे.

या चाचणीच्या अहवालासाठी घोड्यांच्या रक्ताचे नमुने हरयाणा राज्यातील हिसार येथे असलेल्या नॅशनल रिसर्च सेंटरमध्ये पाठवण्यात आले आहेत. या चाचणीच्या अहवालासाठी काही दिवस लागण्याची शक्यता असून त्यानंतरच पुढील कार्यवाही करण्यात येणार असल्याचे ठाणे जिल्हा पशु वैद्यकीय विभागाकडून स्पष्ट करण्यात आले.