स्मार्टकार्डबाबत आरटीओने मागितला खुलासा

म. टा. वृत्तसेवा, ठाणे

गाड्यांचे आरसी स्मार्टकार्ड छापण्यास दिरंगाई होत असल्याची बातमी 'मटा'मध्ये प्रसिद्ध होताच ठाणे आरटीओ अधिकाऱ्यांनी तातडीने रोजमार्टा टेक्नॉलॉजिस प्रा. लि. कंपनीच्या अधिकाऱ्यांची बैठक घेत दिरंगाईबाबत खुलासा मागितला आहे. खुलासाबाबत आठ दिवसांची मुदत दिली असून ही कंपनी काय खुलासा करते, याकडे सर्वांचे लक्ष लागले आहे.

रोजमार्टा टेक्नॉलॉजिस प्रा. लि. कंपनी दिल्लीची असून या कंपनीला गाड्यांचे आरसी स्मार्टकार्ड छापण्याचे कंत्राट देण्यात आले आहे. मात्र मागील काही दिवसापासून ही कंपनी आरटीओला वेळेत स्मार्टकार्ड छापून देत नसल्याने रहिवाशांना वेळेत स्मार्टकार्ड मिळेनासे झाले आहेत. स्मार्टकार्डसाठी रहिवाशांना आरटीओ कार्यालयात चकरा माराव्या लागत आहेत. जून महिन्यात सुमारे १० हजाराच्या आसपास स्मार्टकार्डची छपाई करण्यात आली नव्हती. याबाबत आरटीओच्या अधिकाऱ्यांनी कंपनीला लेखी पत्र पाठवत विलंब शुल्क का आकारण्यात येऊ नये असे पत्र पाठवले होते. या पत्रानंतर कंपनीने स्मार्टकार्ड छपाई करण्याचा वेग वाढवला होता, असेही कळते. तरीही तीन हजाराच्या आसपास कार्डाची छपाई बाकी आहे. तर गाड्यांच्या रेकॉर्डचेही स्कॅनिंगही कंपनीने केले नव्हते. याबाबत 'परवान्यांना छपाईब्रेक' या मथळ्याखाली नुकतीच 'मटा'मध्ये बातमी प्रकाशित झाली होती. या बातमीनंतर ठाण्याच्या आरटीओ अधिकाऱ्यांनी तातडीने गुरुवारी रोजमार्टा कंपनीच्या अधिकाऱ्यांची बैठक घेतली. आणि स्मार्टकार्डच्या छपाईबाबत होणाऱ्या विलंबाबाबत विचारणा केली. कंपनीलाही त्यांचे म्हणणे मांडण्यास संधी द्यायला हवी. नंतरच याबाबत योग्य तो निर्णय घेतला जाईल. आठ दिवसांत कंपनी आपले उत्तर देईल असे संबंधित अधिकारी म्हणाला. मात्र आतापर्यंत चार लाख आरसी स्मार्टकार्डची छपाई केली असल्याचे कंपनीचे म्हणणे आहे.