व्हेल माशाची सुखरूप सुटका

म. टा. वृत्तसेवा, पालघर

मच्छिमारांच्या जाळ्यात अडकलेल्या व्हेल माशाची मच्छिमारांनी सुखरूप सुटका केल्याची घटना पालघर तालुक्यात घडली.

पालघर तालुक्यातील वडराई येथील हितेंद्र मेहेर हे मच्छिमार सहकाऱ्यांसोबत बोट घेऊन पहाटे चार वाजता मासेमारीला गेले होते. समुद्रात १२ सागरी मैल क्षेत्रात त्यांनी त्यांच्या बोटीतील डोल जाळी कवीच्या खुंटांना रोवली. काही वेळाने हे जाळे खेचत असताना त्यांना सुमारे २५ ते ३० फुटांचा व्हेल मासा जाळ्यात अडकून सुटकेसाठी धडपडत असल्याचे दिसले. बोटीतील सर्व मच्छिमार खलाशांनी एकत्र येऊन त्याच्या सुटकेसाठी प्रयत्न सुरू केले. बोटीत असलेल्या घोश्या (काठीला बांधलेले टोकदार आयुध)च्या सहाय्याने त्याच्या शरीराभोवती लपेटलेले जाळे त्याला कुठलीही इजा न करता सुखरूपपणे काढण्यात आले आणि त्यानंतर तो पाण्यात दिसेनासा झाला.

शार्क या अत्यंत खतरनाक म्हणून ओळखल्या जाणाऱ्या प्रजातीमधील हा शार्क व्हेल मासा आकाराने सर्वात मोठा असून शांत आणि प्रवाहातील पाणी तोंडात घेऊन त्याद्वारे आलेले करंदी, मांदेली आदी लहान लहान मासे खाऊन जगत असतो. शार्कप्रमाणे तो अजिबात कोणत्याही वस्तू अथवा प्राणी किंवा अन्य माशांवर हल्ला करीत नाही. समुद्री पर्यावरण राखण्यात या माशांचा मोठा वाटा असून या माशाने त्याच्या शरीरातून टाकलेल्या महाकाय विष्ठेच्या आसपास मोठ्या प्रमाणात प्लवंगाची निर्मिती होत असल्याचे पालघरतील सोनोपंत दांडेकर कॉलेजचे जीवशास्त्राचे प्राध्यापक भूषण भोईर यांनी सांगितले. या प्लवंगाशेजारीच मासे त्यांची अंडी घालीत असल्याने माशांच्या पिलांचे संवर्धन होत असल्याचेही त्यांनी सांगितले.