विचारांच्या आदानप्रदानासाठी ‘साहित्य चावडी’

म. टा. वृत्तसेवा,वसई

यंग स्टार ट्रस्टतर्फे विरारमध्ये ‘साहित्य चावडी’ हे व्यासपीठ तयार करण्यात आले असून भाषाप्रेमींसाठी हे खुले व्यासपीठ असणार आहे, असे या वेळी सांगण्यात आले. विरार भागातील साहित्य चळवळीत काम करणाऱ्या नव्या-जुन्या कार्यकर्त्यांनी या चावडी उपक्रमाच्या प्रारंभाच्या दिवशी उपस्थित राहून या उपक्रमाला शुभेच्छा दिल्या.

आपल्या भारतीय परंपरेत सामाजिक जीवनात विशिष्ट ठिकाणी गाव असो की शहर कारणानिमित्ताने एकत्र येऊन नागरिक विचारांचे आदान - प्रदान करतात. अशा कार्यक्रमातून लेखक, कवी, सामाजिक कार्यकर्तादेखील एकत्र येतो. आपापले विचार मांडतो. विरारमध्ये सुरू होणारा हा चावडी कट्टा अशाच प्रकारे विचारांचे आदान - प्रदान करील. ज्यामुळे सांस्कृतिक क्षेत्रातील लोकांना चळवळीचे व्यासपीठ मिळेल, असे प्रतिपादन यावेळी विविध मान्यवरांनी केले. दर महिन्याच्या चौथ्या शनिवारी हा कट्टा विविध साहित्यिक, सांस्कृतिक चर्चा व काव्य वाचन असे कार्यक्रम आयोजित करणार आहे.

साहित्य चावडीच्या उद्‍घाटन कार्यक्रमास कोकण मराठी साहित्य मंडळाचे पालघर जिल्हाअध्यक्ष कवी नंदन पाटील, कोकण मराठी साहित्य परिषदेच्या नालासोपारा शाखेचे अध्यक्ष रमाकांत वाघचौडे, साहित्य संगमचे संपादक उमाकांत वाघ, कवी नयन जैन, अखिल भारतीय मराठी साहित्य परिषदेचे पालघर जिल्हाध्यक्ष अ. ना. रसनकुटे यांनी शुभेच्छा दिल्या.

यावेळी झालेल्या कवी संमेलनात पल्लवी बनसोडे, वैजयंतीमाला मदने, समीर पराडकर, मंजुषा गवई, प्रा. शुभम पाटील, सुहासिनी पाटील, रमाकांत पाटील या कवींनी कविता सादर केल्या. कार्यक्रमाचे सूत्रसंचालन प्रा. विजय उमर्जी यांनी केले. तर, कवयित्री सुरेखा कुरकुरे यांनी आभार मानले.