म. टा. वृतसेवा, पालघर
बोईसर शहरातील राम मंदिरात श्री शिवप्रतिष्ठान हिंदुस्तानतर्फे आयोजित केलेल्या संभाजी भिडे यांच्या सभेस येथील विविध संघटनांनी विरोध करून ही सभा उधळून लावली. यावेळी तणावाचे वातावरण निर्माण झाले होते. अखेर पोलिसांना पाचारण करून भिडे याना संरक्षणात बोईसरच्या बाहेर नेऊन ठेवावे लागले.
रविवारी सकाळी ११च्या सुमारास संजयनगर येथील राममंदिरात संभाजी भिडे यांची सभा होणार होती. मात्र, या सभेस आरपीआय, दलित पँथर, वंचित बहुजन आघाडी, बहुजन क्रांती मोर्चा, बहुजन समाज पार्टी आदी संघटनांनी तीव्र विरोध करीत सभा उधळून लावली. सकाळी अकराच्या सुमारास विविध संघटनांचे पदाधिकारी सभास्थळी पोहोचले. त्यांनी भिडे यांच्याविरोधात घोषणा देण्यात आल्या. भिडे हे शिवाजी महाराजांबद्दल चुकीचा इतिहास सांगत असून माता जिजाऊंबद्दल अपमानास्पद शब्द वापरून समाजामध्ये दुफळी निर्माण करीत आहेत. शिवाय प्रक्षोभक भाषण करून वातावरण दूषित करण्याचा प्रयत्न करीत असतात, असा विरोधकांनी आरोप केला.
६ डिसेंबरला महापरिनिर्वाण दिवस येणार असून त्याचा उद्रेक समाजाकडून व्हायला नको. तसेच शांतताभंग व्हायला नको म्हणून सदरची सभा त्वरित रद्द करण्यात यावी असे निवेदन विविध आंबेडकरी संघटनांच्या पदाधिकाऱ्यांकडून बोईसर पोलिस ठाण्याला देण्यात आले. यावेळी जोरदार निदर्शने व रास्ता रोको करण्यात आल्याने अखेर दंगलविरोधी पोलिस पथक, दहशतवादविरोधी पथक आणि मोठा पोलिस फौजफाटा तैनात करण्यात येऊन नवापूर नाका ते धोडीपुजा रस्त्यावरील दोन्ही बाजूची वाहतूक पोलिसांनी बंद केली होती.
...
एकजुटीमुळे सभा रद्द
भिडे यांची सभेबद्दल कमालीची गोपनीयता राखण्यात आली होती; परंतु बहुजनवादी आंबेडकरी संघटनांनी व पक्षांनी एकत्रित येऊन प्रखर विरोध दर्शवून सदर कार्यक्रम रद्द करण्यास भाग पाडले. या सभेची माहिती मिळताच पालघर जिल्ह्यातील बहुजन समाज एकवटून निषेधाचे निवेदन बोईसर पोलिसांना देण्यात आले. त्यावेळी आयोजक व बहुजन नेत्यांना एकत्रित बोलावून पोलिस प्रशासनाने योग्य भूमिका राखून व कायदा सुव्यवस्था राखून सदर कार्यक्रम रद्द करण्यास भाग पाडले.