डिझेलचे नमुने तपासणीच्या प्रतीक्षेत

म. टा. वृत्तसेवा, ठाणे

बसमधील डिझेलला रॉकेलचा वास येत असल्याचा संशय व्यक्त झाल्यानंतर टीएमटी प्रशासनाने तपासणीसाठी घेतलेल्या डिझेलच्या नमुन्याला पंधरा दिवस लोटले तरी अद्याप नमुने तपासणीच्या प्रतीक्षेत आहेत. तपासणीसाठी नमुने पाठवायचे कोठे, या संभ्रमात प्रशासन अडकले आहे.

मे महिन्याच्या दुसऱ्या आठवड्यात वागळे इस्टेट डेपोतून लोकमान्यनगर डेपोत टीएमटीची बस आली होती. त्यावेळी डिझेलला केरोसीनचा वास येत असल्याची शंका उपस्थित करण्यात आल्यानंतर ही बाब परिवहन समितीच्या सदस्यांच्या कानावर घालण्यात आली होती. त्यानंतर काही गाड्यांतील डिझेल आणि पंपावरील डिझेल असे एकूण तीन बॉटल्समध्ये नमुने घेतले. परंतु अद्याप नमुने तपासण्यासाठी पाठवण्यातच आलेले नसल्याचे समजते. टीएमटी प्रशासनाने मुंबईतील व्हीजेटीआयकडे नमुने तपासणीसाठी संपर्क साधला. मात्र त्याठिकाणी सध्या परीक्षा सुरू असल्याने प्राध्यापक व्यस्त आहेत, असे त्यांना उत्तर मिळाले. मुंबईतील लॅबचा इंटरनेटवर शोध घेऊन नमुने तपाणीसाठी पाठवले जातील, असे परिवहनमधील अधिकाऱ्याने सांगितले.