अधिकाऱ्यांच्या बनावट सह्या; गुन्हा दाखल

शाळांची मान्यता, स्थलांतराचे प्रकरण

म. टा. प्रतिनिधी, ठाणे

जिल्हा परिषदेच्या नवीन शाळांची मान्यता आणि त्यांच्या स्थलांतरासाठी लागणाऱ्या अर्जांमध्ये जिल्हा परिषदेच्या शिक्षण अधिकाऱ्यांच्या बनावट सह्यांचे पत्र उपसंचालकांकडे पाठवल्याचा धक्कादायक प्रकार उघडकीस आला आहे. या प्रकरणी ठाणे नगर पोलिस ठाण्यात गुन्हा नोंदवण्यात आला आहे. ठाणे ग्रामीण भागातील शाळेच्या नव्या मान्यतेसाठी तसेच शाळाच्या स्थलांतरासाठी शिक्षण विभागाचे उपसंचालकांकडे चार अर्ज करण्यात आले होते. मे ते नोव्हेंबर २०१४ दरम्यान हे अर्ज आले होते. या अर्जांमध्ये शिक्षण अधिकाऱ्यांच्या एका पत्राचादेखील समावेश होता. मात्र हे पत्र शिक्षण अधिकाऱ्यांनी दिले नसल्याचा प्रकार समोर आला. त्यामुळे शिक्षण विभागाने या प्रकरणी पोलिसांकडे गुन्हा दाखल केला. जिल्हा परिषद शिक्षण अधिकाऱ्यांच्या कार्यालयाकडून हा गुन्हा दाखल केला असून उपसंचालक कार्यालयाची फसवणूक केल्याची तक्रार दाखल करण्यात आली आहे.

धक्कादायक बाब म्हणजे, ठाणे जिल्हा परिषदेमध्ये हा खोट्या सह्यांचा प्रकार घडला असून या प्रकरणी ठाणे नगर पोलिसांकडून तपास केला जात आहे, अशी माहिती ठाणे नगर पोलिस ठाण्याचे वरिष्ठ पोलिस निरीक्षक मंदार धर्माधिकारी यांनी दिली.