आम्ही या भागाचे भाई आहोत..., डोंबिवलीत रेल्वेच्या सातपुलावर घडला हाणामारीचा थरार

डोंबिवली, ठाणे : डोंबिवली पश्चिमेतील देवीचापाडा भागात असलेल्या रेल्वेच्या सातपुलावर मंगळवारी संध्याकाळी मोठागावामधील दोन तरुणांना याच भागातील १५ जणांच्या २० ते २५ वयोगटातील तरुणांच्या टोळक्याने लाथाबुक्क्या, बिअर-दारुच्या बाटल्या डोक्यात फोडून बेदम मारहाण केली आहे. याप्रकणी विष्णुनगर पोलीस ठाण्यात गुन्हा दाखल करण्यात आला आहे. या मारहाणीत गंभीर जखमी झालेल्या दोन तरुणांवर केडीएमसीच्या शास्त्रीनगर रुग्णालयात उपचार सुरू आहेत.

अभिषेक शिवदास भोईर (२२, रा. शंकर प्लाझा, मोठागाव) आणि ओमकार बाबाजी माळी (२१) अशी जखमी झालेल्या तरुणांची नावे आहेत. अभिषेकच्या तक्रारीवरुन पोलिसांनी १५ जणांच्या विरुध्द गुन्हा दाखल केला आहे. सचिन म्हात्रे, प्रथम भोईर, महेश चाटसे, राम्या म्हात्रे, लाल्या म्हात्रे, सुसते आंबेकर आणि इतर आठ जण अशी हल्लेखोर तरुणांची नावे आहेत.

या प्रकरणी पोलीस सूत्रांकडून माहिती मिळाली आहे. यातील तक्रारदार अभिषेक आणि त्याचे पाच मित्र प्रेम भोईर, ओमकार माळी, जयदीप भोईर, आकाश डबाले, अनिकेत कुड, प्रतिक भोईर (रा. मोठागाव) हे सर्वजण मंगळवारी दुपारी कामानिमित्त सातपूल रेल्वे पुलावरून पायी पिंपळास भागात गेले होते. संध्याकाळी ते परत घरी येत असताना सातपूल रेल्वे पुलावर बाल्कनीत हल्लेखोर दबा धरून उभे होते. त्यांनी अभिषेक याच्या मित्रांजवळ येऊन 'आम्ही या भागाचे भाई आहोत. तडीपारी भोगून आलो आहोत, आम्हाला ओळखले नाही का? असे धमकावून पुलावरच अभिषेक आणि त्याच्या मित्रांना शिवीगाळ मारहाण सुरू केली. राम्या आणि सचिन यांच्या पुढाकारातून अभिषेक याला रेल्वे मार्गावर पाडून दगड आणि लाथा-बुक्क्यांनी मारहाण करण्यात आली. ही हाणामारी सोडवायला ओमकारमध्ये पडला. त्यालाही बेदम मारहाण करण्यात आली. अभिषेकचे अन्य मित्र हा प्रकार बघून तिथून पळाले. अभिषेक आणि ओमकार हल्लेखोरांच्या तावडीत सापडल्याने त्यांना ठार मारण्याची धमकी प्रथम भोईर आणि सचिन म्हात्रे यांनी दिली. अभिषेकच्या डोक्यात बियर-दारुच्या बाटल्या फोडल्याने तो रक्तबंबाळ झाला होता. मारहाणीनंतर हल्लेखोर पळून गेले.
Women's day : मला घरी सुरक्षित पोहोचवा..., डोंबिवलीत काळी फित लावून मध्य रेल्वेचा निषेध
अभिषेकच्या मित्रांनी त्याला विष्णुनगर पोलीस ठाण्यात आणले. पोलिसांच्या सूचनेवरून त्याला शास्त्रीनगर रुग्णालयात दाखल करण्यात आले. ही घटना लोहमार्ग पोलीस ठाण्याच्या हद्दीत घडल्याने हा गुन्हा शून्य नंबरने दाखल करून डोंबिवली लोहमार्ग पोलीस ठाण्याकडे पाठविण्यात आल्याचे विष्णूनगर पोलीस ठाण्याचे वरिष्ठ पोलिस निरीक्षक पंढरीनाथ भालेराव यांनी सांगितले. या प्रकरणी लोहमार्ग पोलीस फरार हल्लेखोरांचा कसून शोध घेत आहेत.