म. टा. वृत्तसेवा, ठाणे
बंदी असूनही गुटखा, पानमसाल्याची विक्री करणाऱ्या भिवंडीतील चार दुकानांवर अन्न आणि औषध प्रशासनाने मंगळवारी छापा टाकून सव्वा लाख रुपयांचा मुद्देमाल जप्त केला. तसेच चारही दुकाने सील करण्याची कारवाई केल्याने दुकानदारांचे धाबे दणाणले आहेत.
एफडीएचे सहाय्यक आयुक्त (अन्न) एम. एन. चौधरी यांच्या मार्गदर्शनाखाली अन्नसुरक्षा सुरक्षा अधिकाऱ्यांनी कारवाई केली आहे. नजराणा कम्पाऊंड येथील हिमांशू स्टोअर्समधून पान मसाला आणि इतर असे एकूण ६ हजार ५६ रुपयांचा मुद्देमाल जप्त केला आहे. तर, नारपोली येथील महालक्ष्मी स्टोअर्समधून गुटखा, पानमसाला असा एकूण ८९ हजारांचा मुद्देमाल तर शालू जनरल स्टोअर्समधून ३ हजार ८५९ रुपयांचा आणि निजामपुरा येथील फैझल सुपारी स्टोअरमधून २६ हजार ६४० रुपयांचा असा एकूण १ लाख २५ हजार ५५५ रुपयांचा गुटखा, पानमसाल्याचा साठा जप्त करण्यात आला असल्याची माहिती एफडीएने दिली. ही चारी दुकानेनंतर सील करण्यात आली.