सेना, भाजपचे कार्यकर्ते मनसेत

कल्याण : युवा सेना आणि भाजप विद्यार्थी आघाडीच्या पदाधिकाऱ्यांनी रविवारी मनसेचा झेंडा खांद्यावर घेतल्यामुळे निवडणुकीच्या तोंडावर सेना, भाजपला खिंडार पडले आहे.

कल्याण-डोंबिवली महापालिकेत मागील २० वर्षांहून अधिक काळ शिवसेना, भाजप सत्तेत असून यावेळी प्रथमच शिवसेना सत्तेच्या तर भाजप विरोधी बाकावर बसला आहे. तरीही शहरातील विकास कामांचा पुरता बोजवारा उडाला असून दोन्ही पक्षांत युवा नेतृत्वाला संधी न देता वर्षानुवर्षे सत्तेचा उपभोग घेणारे पदाधिकारी आणि लोकप्रतिनिधी यांनाच पुन्हा पुन्हा संधी मिळत असल्यामुळे युवा नेतृत्वात नाराजी आहे. याच नाराजीतून दोन्ही पक्षातील युवा नेतृत्वाने मनसेचा हात पकडला आहे. 'कल्याणात तत्कालीन आमदार प्रकाश भोईर यांनी केलेल्या विकासकामाचा उल्लेख नागरिकांच्या तोंडी असून ही विकासकामे मागील सहा वर्षांत पूर्णत्वास जाऊ शकलेली नाहीत, असे या कार्यकर्त्यांचे म्हणणे आहे. यामुळे सेना, भाजपबद्दल नाराजी व्यक्त होत आहे. याच नाराजीतून रविवारी युवा सेना विभाग अध्यक्ष आणि भाजप विद्यार्थी आघाडीच्या कल्याण शहराच्या शेकडो पदाधिकाऱ्यांनी कल्याण शहर अध्यक्ष विनोद केणे आणि माजी आमदार प्रकाश भोईर यांच्या उपस्थितीत मनसेत अधिकृत प्रवेश केला. टिटवाळ्यात देखील अनेक कार्यकर्त्यांनी मनसेत प्रवेश केल्याने निवडणुकीच्या तोंडावर कल्याण-डोंबिवली मनसेत चैतन्य निर्माण झाले आहे.