ज्येष्ठ नागरिकांसाठी स्वतंत्र डब्याची मागणी

म. टा. वृत्तसेवा, वसई

सर्वसामान्य रेल्वेप्रवाशांसह ज्येष्ठ नागरिकही रेल्वेतून प्रवास करत असतात. मात्र आधीच रेल्वेमध्ये सदैव असणाऱ्या तुडुंब गर्दीमुळे ज्येष्ठ नागरिकांचे अतोनात हाल होतात. त्यामुळे ज्येष्ठ नागरिकांसाठी रेल्वेने तात्काळ स्वतंत्र डबा द्यावा, अशी विनंती वसईतील निर्भय जन मंचने रेल्वे प्रशासनाला केली आहे.

ज्येष्ठ नागरिकांसाठी रेल्वेने लोकलच्या दोन्ही टोकांना एकूण १४ सीट दिल्या आहेत. त्या अत्यंत अपुऱ्या व गैरसोयीच्या आहेत. प्रचंड गर्दीच्या वेळी ज्येष्ठांना गाडीत चढता येत नाही आणि राखून ठेवलेल्या जागेपर्यंत पोहचता येत नाही. तसेच, त्या सीटवर बसलेले अन्य प्रवासी सांगूनसुद्धा उठून जागा देत नाहीत. ज्येष्ठांना त्यांच्या सीटपर्यंत जाण्यास व बसण्यास सहकार्य करा, अशा उद्‍घोषणा रेल्वेकडून होत असल्या तरी अनेकदा त्याचा काही उपयोगच होत नाही. काही वेळेला अन्य प्रवासी ग्रुप तर ज्येष्ठांना अपमानित करतात. म्हणून ज्येष्ठ नागरिकांसाठी रेल्वेने अपंगांप्रमाणे स्वतंत्र डबा राखून ठेवावा, अशी मागणी ‘निर्भय जन मंच’ने केली आहे. ज्येष्ठांना स्वतंत्र डबा द्यावा अशी मागणी वसईतील निर्भय जन मंचनेही लेखी स्वरूपात केली आहे.

६५ वर्षांहून अधिक वयाच्या ज्येष्ठ नागरिकांना रेल्वेत चढताना-उतरताना प्रचंड त्रास होतो. गर्दीच्या वेळात तर ज्येष्ठांना गाडीत चढता-उतरतानाही येत नाही. ज्येष्ठांसाठी स्वतंत्र डबा राखून ठेवल्यास शेकडो ज्येष्ठ नागरिक तेथे चढतील. त्यामुळे सामान्य डब्यातील तेवढी गर्दी कमी होईल व सामान्य डब्यातील लोकांना अडचण होणार नाही, असे त्यांनी म्हटले आहे. या प्रकरणी मुख्य वाणिज्य प्रबंधक, सहाय्यक सुरक्षा आयुक्त, सहाय्यक वाणिज्य प्रबंधक, पश्चिम रेल्वेचे महाव्यवस्थापक यांना तसे लेखी निवेदन देण्यात आले आहे.