म. टा. प्रतिनिधी, ठाणे ज्येष्ठ अभिनेते शरद पोंक्षे यांना ठाणे महापालिकेच्यावतीने देण्यात येणारा जनकवी पी. सावळाराम स्मृती पुरस्कार जाहीर झाला आहे. गेली अनेक दशके आपल्या अभिनयाने चित्रपटसृष्टीत वेगळे स्थान निर्माण करणाऱ्या सिनेनाट्य अभिनेत्री उषा नाईक यांना यावर्षीच्या गंगा-जमुना पुरस्काराने सन्मानित करण्यात येणार आहे. महापौर नरेश म्हस्के यांनी ही घोषणा केली. साहित्य क्षेत्रातील उल्लेखनीय कामगिरीबद्दल कवी प्रशांत डिंगणकर, शिक्षण क्षेत्रात उल्लेखनीय कामगिरी केल्याबद्दल बाळासाहेब खोल्लम तर लक्षवेधी कलावंत म्हणून माधुरी करमरकर यांनाही जनकवी पी. सावळाराम पुरस्काराने सन्मानित करण्यात येणार आहे. रविवार, २२ डिसेंबरला राम गणेश गडकरी रंगायतन येथे होणाऱ्या जनकवी पी. सावळाराम स्मृती समारोह समारंभामध्ये या पुरस्काराचे वितरण होणार आहे. गृहमंत्री एकनाथ शिंदे यांच्या हस्ते आणि महापौर नरेश म्हस्के यांच्या अध्यक्षतेखाली हा समारंभ पार पडणार आहे. दरवर्षी ठाणे महानगरपालिका व जनकवी पी. सावळाराम कला समिती यांच्यावतीने संगीत, चित्रपट, साहित्य, नाट्य, कला व शिक्षण क्षेत्रात उल्लेखनीय कामगिरी करणाऱ्या व्यक्तींना या पुरस्काराने सन्मानित करण्यात येते. २२ डिसेंबरला सायंकाळी ५ वाजता पुरस्काराचे वितरण करण्यात येणार आहे. या निमित्ताने रंगाईनिर्मित जनकवी पी. सावळाराम यांच्या गीतांवर आधारित 'मानसीचा चित्रकार तो' या सांस्कृतिक कार्यक्रमाचे आयोजन करण्यात आले आहे. हा कार्यक्रम नागरिकांसाठी विनामूल्य आहे.
शरद पोंक्षे यांनापी. सावळाराम पुरस्कार
म टा प्रतिनिधी, ठाणे ज्येष्ठ अभिनेते शरद पोंक्षे यांना ठाणे महापालिकेच्यावतीने देण्यात येणारा जनकवी पी सावळाराम स्मृती पुरस्कार जाहीर झाला आहे...
महाराष्ट्र टाइम्स.कॉम 15 Dec 2019, 4:00 am