शिवसेना उपतालुका प्रमुखाची भिवंडीत हत्या

म. टा. वृत्तसेवा, शहापूर

शिवसेनेचे शहापूर उपतालुकाप्रमुख शैलेश नामदेव निमसे (४५) यांची हत्या झाल्याचे, तसेच त्यांचा मृतदेह पेट्रोल टाकून जाळण्याचा प्रयत्न झाल्याचे उघड झाले आहे. ही हत्या राजकीय वैमनस्यातून झाली की अन्य काही कारणांतून याचा तपास पोलिस करीत आहेत.

गुरुवारी मध्यरात्री निमसे यांना एक फोन आल्यानंतर ते घराच्या दरवाजाला बाहेरून कडी लावून गाडीने निघाले. शुक्रवारी सकाळी निमसे यांची गाडी भिवंडी तालुक्यातील दिघाशी नजीकच्या देवचोळे गावाजवळ आढळली. तर गाडीपासून काही अंतराव अर्धवट जळलेला अवस्थेतील त्यांचा मृतदेह मिळाला. त्यामुळे त्यांचा मृतदेह जाळण्याचा प्रयत्न झाल्याचे स्पष्ट दिसत आहे.

या हत्येमुळे शहापुरात तणावाचे वातावरण आहे. ही हत्या कट रचून करण्यात आली आहे, असा आरोप ठाणे जिल्हा शिवसेना प्रमुख प्रकाश पाटील व पालघरचे नगराध्यक्ष उत्तम पिंपळे यांनी केला आहे. निमसे यांचा खून राजकीय वादातून झाला, की बांधकाम व्यवसायातून की अन्य काही कारणामुळे, याचा तपास ठाणे ग्रामीणची स्थानिक गुन्हे शाखा व गणेशपुरी पोलिसांनी सुरू केला आहे.