राजन विचारेंनी पोलिसांसह एकनाथ शिंदेंना आव्हान दिलं आणि मध्यरात्री शब्द खरा करून दाखवला!

ठाणे : ठाण्यातील जिल्हा शाखेच्या वतीने आज झेंडावंदनाचा कार्यक्रम साजरा करण्यात आला. १५ ऑगस्टच्या पूर्वसंध्येला म्हणजेच १४ तारखेला १२ वाजता हा ध्वजारोहणाचा कार्यक्रम राज्याचे मुख्यमंत्री एकनाथ शिंदे यांच्या हस्ते पार पडला. या कार्यक्रमाआधी पोलिसांनी शिवसेना खासदार राजन विचारे आणि शिवसेनेचे ठाणे जिल्हाप्रमुख केदार दिघे यांना दिलेल्या नोटिशीमुळे जिल्ह्यात काही काळ तणावाचं वातावरण निर्माण झालं होतं. मात्र हा ध्वजारोहण सोहळा दिमाखात पार पडला. यावेळी अनेक नागरिक आणि विद्यार्थी या ध्वजारोहणात सहभागी झाले होते. या सोहळ्यादरम्यान मोठ्या प्रमाणात पोलीस फौजफाटा तैनात करण्यात आला होता.

ध्वजारोहण सोहळ्यादरम्यान कायदा आणि सुव्यस्थेचा प्रश्न निर्माण होऊ नये यासाठी ठाण्यातील नौपाडा पोलिसांनी राजन विचारे, केदार दिघे आणि अन्य काही शिवसैनिकांना नोटीस बजावली होती. मात्र शिवसेना कोणत्याही दडपशाहीला घाबरणार नाही. प्रतिवर्षाच्या परंपरेनुसार ठाणे येथील शिवसेना जिल्हा शाखा येथे आज रात्री १२ वाजता ध्वजारोहणाच्या कार्यक्रमाला सर्व शिवसैनिकांसोबत जाणारच, असा इशारा राजन विचारे यांनी पोलिसांना दिला होता आणि त्यानुसार ते या ध्वजारोहन सोहळ्याला उपस्थित राहिले.



दरम्यान, पोलिसांनी शिवसेना नेत्यांना नोटिसा बजावल्या असल्या तरी याबाबत मुख्यमंत्री एकनाथ शिंदे यांनी आपली भूमिका वेगळी असल्याचं स्पष्ट केलं होतं. 'स्वातंत्र्यदिनाचा कार्यक्रम आपल्या सगळ्यांचा आहे. सर्व ठाणेकर धर्मवीर आनंद दिघे साहेबांनी सुरू केलेल्या ध्वजारोहणाच्या कार्यक्रमत सहभागी होत असतात. आपण अमृत महोत्सव वर्ष सण साजरा करतोय, त्यामुळे सर्वांना येऊ द्या आणि जल्लोषात देशभक्ती, राष्ट्रभक्ती जागृत करून आपला स्वातंत्र्यदिनाचा कार्यक्रम पार पाडू, अशा सूचना पोलिसांना दिल्या होत्या,' असं एकनाथ शिंदे यांनी सांगितले.