'तायक्वॉनदो'मध्ये अव्वल
वसई : वसई विरारमधील खेळाडूंनी कोलकाता येथे नुकताच झालेल्या चौथ्या आंतरराष्ट्रीय तायक्वॉनदो स्पर्धेत मध्ये दणदणीत यश संपादन करून दोन सुवर्ण, तीन रौप्य व दोन कांस्यपदके पटकावली आहेत. आदित्य परब व सुची सरोज यांनी सुवर्ण पदक तर अजिंक्य परब, चिराग मोरे व सौरभ गुरव यांनी रौप्यपदक आणि सैफ मलिक, हार्दिक शेठ व सौरभ यादव यांनी कांस्यपदक विविध गटांमध्ये पटकावले आहे. या स्पर्धेसाठी मोलाचे मार्गदर्शन राष्ट्रीय प्रशिक्षक राजा मकवाना, जे के कॉर्पस टीमचे संयोजक यांनी केले. हे सर्व खेळाडू के कॉर्पस टीम चे सदस्य आहेत. या संघाला विशेष प्रशिक्षण कोरियाचे प्रशिक्षक मास्टर ली वांग आणि आंतरराष्ट्रीय खेळाडू सईद हसन रेजे यांचा कडून प्राप्त झाले.
..
स्वच्छता अभियान
वसई : मी जागृत बंदर पाडेकर सामाजिक संस्थेतर्फे स्वच्छता मोहीम राबवण्यात आली. यावेळी अर्नाळा गावातील छोटे मोठे गल्ली, छत्रपती शिवाजी चौक, स्वामी विवेकानंद हॉस्पिटल परिसर, विठ्ठल मंदिर विभाग, पोलिस जेट्टी, जंजिरे अर्नाळाकडे जाणाऱ्या रस्त्याची सफाई करण्यात आली. त्यानंतर कचऱ्याची विल्हेवाट लावण्यात आली. मोहिमेमध्ये सुरेश नाईक, सागर पाटील, महेंद्र पाटील, हितेश तांडेल, गणेश मेहेर, धनंजय म्हात्रे, देवानंद वा. म्हात्रे, गणेश तांडेल, साई पाटील, ऊर्वी पाटील यांसह इतर सहभागी झाले होते.
..
दुर्वेशचे गोलंदाजीत यश
वसई : आझाद मैदानावर कांगा लीग शेवटच्या सामन्यात अवर्स क्रिकेट क्लब व स्टार क्रिकेट संघात सामना रंगला होता. यात गोलंदाजीची उत्तम कामगिरी पार पाडत वसईच्या दुर्वेश पितळे याने १२ षटकात ६ निर्धाव तर २८ धावा देत ९ जणांना बाद केले. स्टार संघाने नाणे जिंकून अवर्स संघाला प्रथम फलंदाजी दिली. १११ धावाचे लक्ष्य स्टार समोर ठेवले होते मात्र पितळे ९ जणांना बाद करून लीग कांगामध्ये प्रथम क्रमांकाचा गोलंदाज ठरला आहे.