'करोना' प्रतिबंधात्मक उपाययोजनांचा आढावा
आदेशांच्या पालनाची सूचना
म. टा. प्रतिनिधी, ठाणे
ठाणे महापालिकेच्या आयुक्तपदी नियुक्त करण्यात आलेल्या सनदी अधिकारी विजय सिंघल या शुक्रवारी महापालिका मुख्यालयात येऊन आयुक्तपदाचा कार्यभार स्वीकारला. आयुक्तपदाचा कार्यभार स्वीकारल्यानंतर लगेचच त्यांनी सर्व वरिष्ठ अधिकाऱ्यांची तात्काळ बैठक घेऊन करोनाच्या प्रतिबंधात्मक उपाययोजनेबाबतचा घेतला. यावेळी त्यांनी महापालिकेत कर्मचाऱ्यांची उपस्थिती शिथिल करण्याच्या सूचना दिल्या. तसेच जीवनावश्यक वस्तू पुरवणाऱ्या आस्थापना वगळून इतर सर्व खाजगी आस्थापना बंद ठेवण्याचे आदेशही त्यांनी दिले.
नागरिकांची एकाच ठिकाणी होणारी गर्दी टाळण्याच्यादृष्टीने महापालिका भवनात येणाऱ्या अभ्यागतांची गर्दी टाळण्यासाठी मुख्यालय तसेच प्रभाग समितीमध्ये येणाऱ्या अभ्यागतांना अत्यावश्यक कामे वगळता प्रवेश बंद करण्याचे निर्देश दिले. सार्वजनिक वाहतूक व्यवस्थेमधील अनावश्यक गर्दी कमी होण्यासाठी महापालिकेत बाहेरून लोकल, बसने येणाऱ्या कर्मचाऱ्यांनी कार्यालयात उपस्थित न राहता आवश्यकतेनुसार घरातूनच काम करावे. महापालिका कार्यालयातील तातडीचे कामकाज चालू राहण्याच्या दृष्टिकोनातून दररोज अधिकारी व कर्मचाऱ्यांची उपस्थिती राहील याची दक्षता घेण्याच्या सूचना दिल्या. सर्व अधिकारी, कर्मचाऱ्यांनी आपले निवासी पत्ते, ई-मेल आयडी, मोबाइल आणि निवास दूरध्वनी क्रमांक आपापल्या विभाग कार्यालयांना उपलब्ध करून द्यावेत. तसेच, संपर्क पत्यावर ते उपलब्ध राहतील याची प्रत्येक कर्मचारी, अधिकाऱ्यांनी दक्षता घ्यावी, तसेच कार्यालयात उपस्थित राहण्याच्या सूचना देण्यात आल्यास त्यांनी त्यानुसार कार्यालयात उपस्थित राहणे अनिवार्य राहणार आहे. त्याचबरोबर परिवहन सेवेच्या बसमधून प्रवासी वाहतूक करताना उभे राहून प्रवास करणार नाहीत याची खबरदारी घ्यावी. उभे राहून प्रवास करण्यास मज्जाव करणे तसेच प्रत्येक बसमध्ये एका सीटवर एक प्रवासी बसेल याची दक्षता घेण्याच्या सूचना दिल्या.
करोना विषाणूला प्रतिबंध करण्याच्या अनुषंगाने ठाणे महानगरपालिकेने कासारवडवली येथे निर्माण केलेल्या ४० खाटांच्या अलगीकरण कक्षासह दाखल होणाऱ्या व्यक्तींना देण्यात येणाऱ्या विविध आवश्यक सोयीसुविधांचाही त्यांनी आढावा घेतला. महापालिका क्षेत्रात ‛करोना विषाणूचा संसर्ग वाढू नये तसेच तत्काळ उपाययोजना करण्याबाबतचे निर्देश त्यांनी आरोग्य विभागासह सर्व विभागास दिले. यावेळी करोनाबाबत नागरिकांमध्ये असणारे गैरसमज दूर करण्यासाठी व्यापक प्रमाणात जनजागृती मोहीम राबविण्याचे निर्देश त्यांनी दिले.
नव्या आयुक्तांचा परिचय
विजय सिंघल हे १९९८ बॅचचे आयएएस अधिकारी असून त्यांनी आयआयटी रुडकी येथून बी. ई. (सिव्हिल) सुवर्णपदक पटकावले आहे. तर आयआयटी दिल्ली येथून बिल्डिंग सायन्स अँड कन्स्ट्रक्शन मॅनेजमेंटमध्ये एमटेकचे शिक्षण पूर्ण केले आहे. लंडनच्या किंग्ज कॉलेजमधून लोकसेवा धोरण व व्यवस्थापन या विषयात एमएससीचे शिक्षण पूर्ण केले आहे. सिंघल यांनी सहाय्यक जिल्हाधिकारी, मलकापूर, बुलढाणा, मुख्य कार्यकारी अधिकारी, जिल्हा परिषद, अहमदनगर, मुख्य कार्यकारी अधिकारी, जिल्हा परिषद, औरंगाबाद, हिंगोली जिल्हाधिकारी, जळगाव जिल्हाधिकारी, कोल्हापूर महापालिका आयुक्त, साखर आयुक्त, राज्य उत्पादन शुल्क आयुक्त, उद्योग आयुक्त आणि बृहन्मुंबई महापालिकेत अतिरिक्त आयुक्त म्हणून काम केले आहे. जळगाव जिल्हाधिकारी असताना राबविलेल्या नदीजोडणी प्रकल्पासाठी 'सार्वजनिक क्षेत्रातील उत्कृष्ट प्रशासनासाठी पंतप्रधान पुरस्कार' मिळाला आहे. स्वच्छ भारत अभियान अंतर्गत 'भारतातील सर्वात स्वच्छ राज्याची राजधानी' या विभागात मुंबई शहराला स्वच्छ, सुंदर बनविल्याबद्दल राष्ट्रीय पुरस्काराही त्यांनी मिळवला आहे. ऑस्ट्रेलियाच्या ब्रिस्बेन येथे आयोजित 'आंतरराष्ट्रीय नदी परिषदेत जळगाव जिल्ह्यातील नदी-जोडणी' प्रकल्पाच्या सादरीकरणासाठी त्यांना आमंत्रित करण्यात आले होते. मुंबई महापालिकेतील डिजिटल उपक्रमांसाठी 'राष्ट्रीय डिजिटल ई-शासन पुरस्कार' देण्यात आला आहे.