म. टा. वृत्तसेवा, ठाणे
अंमली पदार्थांची तस्करी करणाऱ्या जम्मू काश्मीरच्या दोन युवकांना ठाणे ग्रामीण पोलिसांनी मिरारोडमधून अटक केली आहे. आरोपींकडून एमडी पावडर आणि चरस जप्त करण्यात आले असून मिरारोड पोलिस ठाण्यात गुन्हा दाखल करण्यात आला आहे. विशेष म्हणजे आरोपींनी चरस काश्मीरमधून आणला असल्याची माहिती पोलिस अधिकाऱ्यांनी दिली.
अली मोहम्मद गुलाम लोन (२२) आणि शब्बीर अब्दुलाअहद खांदे (२६) अशी या आरोपींची नावे आहेत. दोघेही जम्मू काश्मीरच्या श्रीनगरमधील इदगा येथील राहणारे असून सध्या आरोपी पोलिस कोठडीत आहेत. रविवारी ठाणे ग्रामीण पोलिस मिरारोड परिसरात गस्त घालत होते. तेव्हा दोन संशयित पोलिसांच्या नजरेस पडले. या संशयितांना ताब्यात घेत चौकशी केला असता, लोन आणि खांडे अशी त्यांची नावे होती. दोघेही जम्मू काश्मीरचे निघाले. आरोपींची झडतीही घेण्यात आली. यामध्ये लोन याच्याकडे १० ग्रॅम एमडी पावडर आणि खांदे याच्याकडे २० ग्रॅम चरस मिळाले. या अंमली पदार्थांची एकूण किंमत २१ हजारांच्या आसपास असल्याची माहिती पोलिसांनी दिली. पोलिसांच्या चौकशीत आरोपी पुड्यांमधून अंमली पदार्थांची विक्री करत होते. जम्मू काश्मीरमधून तस्कर थेट ठाणे जिल्ह्यात येऊन अंमली पदार्थांची तस्करी करत असल्याचे दिसत आहे. शिवाय नववर्षाच्या दोन दिवस अगोदर झालेल्या या कारवाईने खळबळ उडाली आहे. काही दिवसांपूर्वी कोकेनच्या तस्करी प्रकरणात मिरारोडमधून ग्रामीण पोलिसांनी तीन नायजेरियन नागरिकांना पकडले होते.