डोंबिवलीत कारच्या बोनेटमध्ये दिसले तीन साप, धामणसह विषारी डुरक्या घोणसही आढळला

डोंबिवली : कल्याण-डोंबिवली जवळच्या गाव-खेड्यांत मोठ्या प्रमाणात सध्या साप आढळून येत आहेत. आता पश्चिम डोंबिवली एका मंडप डेकोरेटर्सजवळ असलेल्या कारच्या बोनेटमध्ये, दुसरा गांधीनगरमध्ये असलेल्या सोसायटीत, तर तिसरीकडे पूर्वेतील एका गॅरेजमध्ये भलामोठा साप आढळून आला. या तिन्ही सापांना जीवदान देण्यात आले असून त्यांना नैसर्गिक अधिवासात सोडण्यात आले आहे.

पश्चिमेकडे असलेल्या जुनी डोंबिवलीतील उल्का मंडप डेकोरेटर्सजवळ पार्क केलेल्या कारमध्ये साप घुसल्याची माहिती पॉजच्या हेल्प लाइनला मिळाली होती. फोन करणाऱ्याने आमच्या कारमध्ये साप घुसला आहे, आम्ही खूप खबरलो आहे. लवकर या, अशी विनवणी केली. पॉजचे संस्थापक निलेश भणगे यांच्या मार्गदर्शनाखाली ऋषिकेश सुरसे आणि त्याचा सहकारी प्रथमेश गोडसे यांनी घटनास्थळी धाव घेतली. त्या कारच्या इंजिनमध्ये धामण जातीचा ६ ते ७ फुटाचा बिनविषारी साप अडकल्याचे आढळून आले. इंजिनच्या अडगळीतून या सापाची सहिसलामत सुटका करण्यासाठी सर्प मित्रांना जवळपास २ तासांचा कालावधी लागला. साप पकडनंतर भयभीत झालेल्या बघ्यांनी सुटकेचा निःश्वास सोडला. या सर्पमित्रांनी उपस्थितांना सापांची माहिती दिली. त्यानंतर हा साप शहराजवळच्या जंगलात सोडण्यात आला.

ही घटना ताजी असतानाच डोंबिवली पूर्वेकडील गांधीनगरमध्ये असलेल्या ओमकार सोसायटीत साप असल्याची खबर मिळाली. ही माहिती कळताच सर्प मित्रांनी घटनास्थळी धाव घेतली. तिथून ४ फुटांच्या धामण जातीच्या सापाची सुटका करण्यात आली. तर कल्याण-शिळ महामार्गावर असलेल्या नेकणीपाड्यातील एका गॅरेजमध्ये साप आढळून आला. सापाला पाहताच गॅरेजमधील मेकॅनिकसह वाहन दुरुस्ती करण्यासाठी आलेल्यांची घाबरगुंडी उडाली. सकाळी दहाच्या दरम्यान गॅरेज उघडल्यानंतर गॅरेजमध्ये काम करणाऱ्या कामगारांच्या ही बाब लक्षात येताच त्यांनी पॉजचे संस्थापक निलेश भणगे यांना माहिती दिली. भणगे यांनी तातडीने घटनास्थळी जाऊन सापाची सुटका करून त्याला ताब्यात घेतले. हा साप डुरक्या घोणस असून ते साधारणत: एक महिन्याचे पिल्लू आहे. भक्ष्य गिळल्याने हा साप त्याठिकाणी शांतपणे पडून होता. या सापाला मलंगगड पट्ट्यातील त्याच्या अधिवासात सोडणार असल्याचे निलेश भणगे यांनी सांगितले.


पशू-पक्षांच्या जीवनमानावर विपरीत परिणाम

शुक्रवारी आणि शनिवारी जिल्ह्यासह ठिकठिकाणी सोसाट्याच्या वाऱ्यासह अवकाळी पाऊस पडला. याचा परिणाम जीवसृष्टीवर झाला. पशू-पक्षी बऱ्यापैकी हवालदिल झाले होते. जीव वाचविण्यासाठी पशू-पक्षांनी मिळेल तो आसरा घेतला होता. त्यामुळे साप बाहेर पडले असावेत, असा कयास पॉजचे संस्थापक निलेश भणगे यांनी व्यक्त केला.