भिवंडी गुन्हे शाखेची कामगिरी
म. टा. प्रतिनिधी, ठाणे
सोनसाखळीचोरी, घरफोडीसह अन्य गुन्ह्यांतील फरारी आरोपींच्या गुन्हे शाखेच्या भिवंडी युनिटने मुसक्या आवळत एक महिन्यात ३८ गुन्ह्यांची उकल केली. १५ आरोपींना अटक करण्यात आली असून या आरोपींकडून २२ लाखांच्या आसपास मुद्देमालही हस्तगत करण्यात आला आहे. गुन्हे शाखेच्या या कारवाईने आरोपींचे चांगलेच धाबे दणाणले आहेत.
मोक्काअंतर्गत कोळसेवाडी पोलिस ठाण्यात गुन्ह्याची नोंद असलेले दोन आरोपी मागील दीड वर्षांपासून फरार होते. या आरोपींचा शोध घेत भिंवडी युनिटने अलीहसन फिरोज सय्यद (१९) आणि त्याचा साथीदार समीर शब्बीर इराणी उर्फ समीर संपत भंडारी उर्फ सम्या (२३) या दोघांना अटक केली. त्यांच्याविरुद्ध भिवंडी शहर पोलिस ठाण्यात गुन्हा दाखल असून चौकशीत कोळसेवाडी, मानपाडा, टिळकनर, विठ्ठलवाडी पोलिस ठाण्याच्या हद्दीत घडलेले सोनसाखळी चोरीचे एकूण सात गुन्हे उघडकीस आले आहेत. तसेच, पाच लाख २२ हजार रुपये किमतीचे १७४ ग्रॅम वजनाचे दागिने हस्तगत केले आहेत. याशिवाय भिवंडी शहरात घरफोडी करणाऱ्या सात आरोपींना अटक करण्यास गुन्हे शाखेला यश आले आहे. या आरोपींकडून ११ लाख ३४ हजारांचे ३७८ ग्रॅम दागिने, रक्कम, लॅपटॉप आणि घड्याळ आदी मुद्देमाल हस्तगत केला आहे. तसेच, वृद्धांना बोलण्यात गुंतवून सोन्याचे दागिने लांबवण्याच्या घटना मागील काही महिन्यांत वाढल्या होत्या. याही गुन्ह्यांचा उलगडा करण्यास गुन्हे शाखा यशस्वी झाली आहे. राहुल सोलंकी (२३) याला अटक केली आहे. दहा गुन्ह्यांतील चार लाख ३९ हजार ५०० रुपायांचे १४६ ग्रॅम दागिने आरोपींकडून हस्तगत केले आहेत. एक महिन्यात मोबाइल, मोटारसायकल आणि टॉवर बॅटरी चोरीमध्ये पाच जणांना अटक करत सहा गुन्ह्यांची उकल केली आहे. एक लाख दोन हजारांचा मुद्देमालही पोलिसांनी हस्तगत केला आहे.
अशाप्रकारे महिनाभरात पोलिसांनी ३८ गुन्ह्यांत १५ आरोपींना अटक केली आहे. २० लाख ९५ हजारांचे दागिने आणि अन्य मुद्देमाल असा एकूण २१ लाख ९७ हजार ५०० रुपयांचा मुद्देमाल जप्त केला आहे. वरिष्ठ पोलिस निरीक्षक शीतल राऊत, पोलिस निरीक्षक अशोक होनमाने, सहाय्यक पोलिस निरीक्षक महेंद्र जाधव, पोलिस उप निरीक्षक रवींद्र पाटील यांच्या पथकाने ही कामगिरी केली आहे.