वसई : पाचूबंदर येथील जीवदानी विशेष मुलांच्या शाळेत रक्षाबंधनाचा कार्यक्रम उत्साहात साजरा करण्यात आला. कार्यक्रमाचे प्रमुख पाहुणे 'आमची वसई' सामाजिक समूहाचे सदस्य कुलदीप मलिक व मधुबाला सिंग यांच्या हस्ते दीपप्रज्वलन करण्यात आले. त्यानंतर शाळेतील विशेष विद्यार्थ्यांनी त्यांना राखी बांधली. शाळेतील विद्यार्थ्यांनी तयार केलेल्या राख्या दरवर्षी सैनिकांना पाठवण्यात येतात. विशेष मुलांबरोबरचा हा एक अविस्मरणीय कार्यक्रम असल्याचे प्रमुख पाहुण्यांनी यावेळी सांगितले. कार्यक्रमास जीवदानी पुनर्वसन केंद्राच्या प्रमुख सुरेखा सावंत व मुख्याध्यापिका स्मिता कुंटिनो, ज्योती भोवड, प्रजीत पाटील, साधना ॲगस्टीन, समीधा तोडणकर, विजय जांभेकर यांसह इतर मान्यवर उपस्थित होते.
सन्मान समारंभ
वसई : भाईंदर येथे राष्ट्रीय चौहान महासंघाचे २७वे कार्यकर्ता शिबीर व सन्मान समारोहाचे आयोजन करण्यात आले होते. यावेळी चौहान महासंघातर्फे आमदार नरेंद्र मेहता यांचा सत्कार करण्यात आला. यावेळी मेहता यांनी, चौहान महासंघाला समाजहितासाठी सर्वतोपरी मदत करू, असे सांगितले. यावेळी चौहान महासंघाचे राष्ट्रीय अध्यक्ष मुनीब सिह चौहान, सी. पी. चौहान, अनिल चौहान, व इतर पदाधिकारी, नागरिक मोठया संख्येने उपस्थित होते.
क्रिकेट स्पर्धा ( फोटो )
वसई : भाईंदर येथे आमदार चषक २०१९ या पावसाळी क्रिकेट स्पर्धेचे आयोजन केले होते. यावेळी आमदार नरेंद्र मेहता यांची उपस्थिती होती. यावेळी बोलताना ते म्हणाले, या मैदानाचे उद्घाटन मी महापौर असताना जानेवारी २००८मध्ये माझ्या हस्ते करण्यात आले होते. त्या मैदानाचा चांगल्या प्रकारे वापर होत असल्याने समाधान वाटते. यावेळी अमजद शेख, नगरसेवक नरेश पाटील, युवा मोर्चाचे जिल्हा अध्यक्ष नीलेश सोनी यांसह इतर मान्यवर व नागरिक मोठ्या संख्येने उपस्थित होते.