गृहनिर्माण संस्थांसाठी स्वतंत्र कायदा

म. टा. विशेष प्रतिनिधी, ठाणे

गृहनिर्माण संस्था या अन्य सहकारी संस्थाप्रमाणे नफा कमावणाऱ्या संस्था नसून त्यासाठी स्वतंत्र कायदा करण्याची प्रक्रिया सरकारने सुरू केली असून त्यासाठी नेमलेल्या समितीवर ठाणे जिल्हा गृहनिर्माण फेडरेशनचे अध्यक्ष सीताराम राणे यांची निवड करण्यात आली आहे.

महाराष्ट्रात मुमारे एक लाख नोंदणीकृत गृहनिर्माण संस्था आहेत. मात्र, बँका, साखर कारखाने, पतपेढ्या यांसारख्या व्यावसायिक नफा कमावणाऱ्या संस्थांसह गृहनिर्माण संस्थांसाठी एकच प्राधिकरण आहे. त्यामुळे गृहनिर्माण संस्थांसाठी स्वतंत्र कायदा करावा किंवा विद्यमान कायद्यात स्वतंत्र प्रकरण अंतर्भूत करावे, यासाठी सीतारामे राणे गेल्या नऊ वर्षांपासून पाठपुरावा करत होते. त्यांच्या या प्रयत्नांना अखेर यश आले असून महाराष्ट्राचे सहकारमंत्री सुभाष देशमुख यांनी सहकार कायद्यात गृहनिर्माण संस्थांसाठी वेगळे प्रकरण समाविष्ट करण्याची घोषणा केली आहे. केवळ एवढेच नव्हे तर या प्रकरणाचा मसुदा ठरविण्यासाठी विभागीय सहनिबंधक संदीप देशमुख यांच्या अध्यक्षतेखाली समिती स्थापन करण्यात आली आहे. या शासकीय समितीत सदस्य म्हणून सीताराम राणे यांचीही नियुक्ती झाली आहे.