म. टा. वृत्तसेवा, वसई
'के. जी. हायस्कुल माजी विद्यार्थी सेवा संस्था आगाशी' यांच्यातर्फे 'देणे ईश्वराचे' या संगीत मैफलीचे आयोजन नुकतेच शाळेच्या प्रभुदास सभागृहात करण्यात आले होते. दोन तास चाललेल्या या गाण्याच्या कार्यक्रमाला आगाशी ग्रामस्थांनी व संगीत रसिकांनी चांगला प्रतिसाद दिला.
पहिल्यांदाच आगाशी गावात आयोजित करण्यात आलेल्या या कार्यक्रमाला सभागृह भरून रसिक उपस्थित होते. सोहळ्याचे आयोजन के. जी. हायस्कुलच्या माजी विद्यार्थी संघाचे अध्यक्ष अजीव पाटील यांच्या मार्गदर्शनाखाली करण्यात आले होते. या मैफलीत मराठी रसिकमनावर कायम गारुड केलेल्या मराठी-हिंदी गाण्यांनी श्रोत्यांना दोन तास खिळवून ठेवले. 'असा बेभान हा वारा', 'गं साजणी', 'जिवाशिवाची बैल जोडी', तसेच 'चढता सुरज', 'करवटे बदलते रहे', 'आजा सनम'.. या गाण्यांना 'वन्स मोअर' मिळवत रसिकांची दाद मिळवली. गायक सौरभ म्हात्रे, जुईली पाटील, स्मिता जोशी यांच्या समवेत भरत म्हात्रे यांनी रसिकांची मने जिंकली. निवेदक सुजाता कवळी यांच्या निवेदनाने मैफल उत्तरोत्तर रंगत गेली. या मैफलीला वादकवृंदाने ही चांगली साथ दिली. एकुण २० गाजलेली गाणी सादर करण्यात आली. लोकप्रिय गाण्यांच्या सादरीकरणानंतर टाळ्यांच्या कडकडाट होत होता. शाळेच्या वेगवेगळ्या बॅचचे माजी विद्यार्थी या कार्यक्रमाला आवर्जून उपस्थित होते. माजी विद्यार्थी संघाने याआधी इतर कार्यक्रमही केले आहेत. दिवाळीचे औचित्य साधून या संगीत मैफलीचे पहिल्यांदाच आयोजन करण्यात आले व रसिकांनी चांगला प्रतिसाद दिल्याने पुढील वर्षीही अशा कार्यक्रमाचे आयोजन केले जाईल, असे के. जी. हायस्कुल च्या माजी विदयार्थी संघाचे अध्यक्ष अजीव पाटील यांनी सांगितले.
राजेश राऊत, सुबोध पिंगळे, प्रफुल म्हात्रे, हर्षद कवळी, कमलेश ठाकूर आणि किरण आपटे यांनी आयोजनासाठी परिश्रम घेतले. माजी विद्यार्थी संघाच्या पदाधिकाऱ्यांनी उपस्थित मान्यवरांचे स्वागत केले.