मटा वृत्तसेवा, पालघर
तलासरीसारख्या ग्रामीण भागात आता शिक्षणाच्या संधी उपलब्ध झाल्या आहेत. तथापि स्पर्धा परीक्षांना सामोरे जाताना विद्यार्थ्यांनी वाचन संस्कृती जोपासावी आणि त्यासाठी लोकराज्यसारख्या विश्वासार्ह नियतकालिकांचे अवश्य वाचन करावे, असे आवाहन प्राचार्य डॉ. भगवान रजपूत यांनी केले.
माहिती व जनसंपर्क महासंचालनालयाच्या लोकराज्य वाचक अभियानाअंतर्गत जिल्हा माहिती कार्यालय, पालघरच्या वतीने आज तलासरी येथील कॉ. गोदावरी शामराव परुळेकर महाविद्यालयात वाचक मेळाव्याचे आयोजन करण्यात आले होते. त्यावेळी डॉ. रजपूत बोलत होते. जिल्ह्यातील चिंचणी येथील पी. एल. श्रॉफ महाविद्यालयाचे प्रा. अण्णा डोंगरदिवे, प्रा. ज्ञानेश्वर भोसले यावेळी मार्गदर्शक म्हणून उपस्थित होते.
डोंगरदिवे यांनी विद्यार्थ्यांशी संवाद साधताना वाचनाचे महत्त्व पटवून दिले. ते म्हणाले, जीवनात यशस्वी होण्यासाठी विद्यार्थ्यांनी कोणत्याही प्रसंगाला न घाबरता तोंड देण्याची सवय अंगिकारावी. स्वत:वर विश्वास ठेवून ध्येय निश्चिती करताना अभ्यासाच्या सरावावर भर द्यावा. या प्रक्रियेत विश्वासार्ह माहिती मिळविण्यासाठी लोकराज्य मासिक निश्चितच उपयुक्त ठरेल, असा विश्वास त्यांनी विद्यार्थ्यांना दिला. लोकराज्य वाचक अभियान संकल्पना राबवित असल्याबद्दल त्यांनी महासंचालनालयाला धन्यवाद दिले.
प्रा. भोसले यांनी देखील वाचक अभियानाच्या माध्यमातून विद्यार्थ्यांमध्ये लोकराज्यची ओळख निर्माण करण्याच्या या उपक्रमाचे कौतुक केले. अतिशय कमी किमतीत विश्वासार्ह आणि उपयुक्त माहिती देणारे हे मासिक असल्याचे ते म्हणाले. लोकराज्यमध्ये प्रकाशित होणारी माहिती ही सर्वसमावेशक, समाजहिताची तसेच सर्व स्तरांतल्या वाचकांसाठी उपयुक्त असते त्याचबरोबर ती प्रासंगिक आणि अपडेटेडही असते असे निरीक्षणही त्यांनी नोंदविले. समाजमाध्यमांमधून येणाऱ्या माहितीच्या प्रचंड ओघामध्ये लोकराज्यमधील माहिती ही विश्वास ठेवण्याजोगी असते त्यामुळे युवकांनी ती आवर्जून वाचावी, असे आवाहन त्यांनी केले.
प्रारंभी प्रभारी जिल्हा माहिती अधिकारी ब्रिजकिशोर झंवर यांनी प्रास्ताविकाद्वारे लोकराज्यची उपयुक्तता पटवून दिली. त्याचबरोबर शासनाच्या युवा माहिती दूत उपक्रमाचीही ओळख करून दिली. कार्यक्रमाचे सूत्रसंचलन प्रा.शिक्रे यांनी केले. यावेळी विद्यार्थ्यांनी लोकराज्यच्या स्टॉलला भेट देऊन त्याविषयी अधिक माहिती जाणून घेतली. या अभियानात विद्यार्थी -विद्यार्थिनी मोठ्या संख्येने उपस्थित होते.