पोलिसांच्या सतर्कतेमुळे वाचला जीव
म. टा. प्रतिनिधी, ठाणे
आर्थिक विवंचना आणि मुलाचा आत्महत्येमुळे नैराश्य आलेल्या एका व्यक्तीने मंगळवारी सकाळी कळवा नाका येथील बांधकाम चालू असलेल्या उड्डाणपुलावरून गळफास लावून आत्महत्येचा प्रयत्न केला. त्याने पुलाच्या लोखंडी सळ्याना दोर बांधून गळ्याला फास लावत पुलावरून खाली उडी मारली. मात्र, पोलिसांनी समयसूचकता दाखवत क्रेनच्या सहाय्याने अवघ्या चार मिनिटातच या व्यक्तीची सुटका करून प्राण वाचवले. सकाळी अचानक घडलेल्या या थरारक घटनेमुळे खळबळ उडाली होती. तसेच कळवा नाक्यावर थोड्यावेळ वाहतूककोंडी झाली होती.
धनाजी भगवान कांबळे (५० रा. कळवा) असे या व्यक्तीचे नाव असून ते रंगकाम करतात. कळवा नाका येथे उड्डाणपुलाचे बांधकाम सुरू असून सकाळी ११ वाजता धनाजी उड्डाणपुलावर गेले. सोबत दोरी होती. दोरीचे एक टोक उड्डाणपुलाच्या लोखंडी सळयांना बांधले गळ्याला फास लावत उडाणपुलावर उभे राहत ते आत्महत्येचा प्रयत्न करत होते. यामुळे बघ्यांची गर्दी मोठ्या प्रमाणावर झाली होती. येथून कळवा पोलिस ठाण्याचे वरिष्ठ पोलिस निरीक्षक एस. आर. बागडे गाडीतून पोलिस उपआयुक्त कार्यालयात निघाले होते. त्यांच्या निदर्शनास हा प्रकार येताच त्यांनी त्याला वाचवण्यासाठी प्रयत्न सुरू केले. उड्डाणपुलावरून उडी मारण्याच्या प्रयत्नात कांबळे असतानाच बागडे यांनी त्यांची समजूत काढली. मात्र, ही व्यक्ती काहीच ऐकण्याच्या मनस्थिती नव्हती. गळ्याला फास लावून त्यांनी पायातील बूट खाली काढून फेकले आणि उड्डाणपुलावरून लटकले. यावेळी त्याने हाताने दोरी पकडून ठेवली होती. त्यामळे येथून जाणारा एक ट्रक खाली उभा करण्यात आला. मात्र ट्रक आणि या व्यक्तीमधील अंतर अधिक होते. त्याचवेळी तेथून जात असलेली एक क्रेन थांबवण्यात आली. त्यावर पोलिस कर्मचाऱ्याने चढत धनाजी याच्या गळ्याभोवतीचा दोर कापला. अवघ्या तीन ते चार मिनिटांतच पोलिसांनी या व्यक्तीला वाचवण्याची मोहीम पार पाडली.
घटना घडली त्यावेळी धनाजी नशेत होते. त्यांच्या मुलाने चार महिन्यांपूर्वी रेल्वेखाली आत्महत्या केली होती. तसेच आर्थिक विवंचनेतून त्याने आत्महत्येचा प्रयत्न केल्याची माहिती वरिष्ठ पोलिस निरीक्षक एस. आर. बागडे यांनी दिली.