'सिडको'चा अधीक्षक अभियंता ताब्यात; १५ हजारांच्या लाचप्रकरणी कारवाई

ठाणे : सिडकोच्या अधीक्षक अभियंत्यासह एका निवृत्त सहाय्यक कार्यकारी अभियंत्याला १५ हजार रुपयांच्या लाचप्रकरणी लाचलुचपत प्रतिबंधक विभागाने (एसीबी) शुक्रवारी ताब्यात घेतले. अधीक्षक अभियंता प्रकाश मोहिले, निवृत्त सहाय्यक कार्यकारी अभियंता संजय डेकाटे अशी या अधिकाऱ्यांची नावे आहेत. त्यांच्याविरुद्ध खांदेश्वर पोलिस ठाण्यात गुन्हा दाखल झाला आहे.


नवीन पनवेल येथील सिडको नोडल कार्यालयाच्या संरचनात्मक दुरुस्ती केलेल्या कामाच्या बिलाच्या मंजुरीसाठी आवश्यक इंटर्नल क्वालिटी ऑडिट रिपोर्टवर सही करण्यासाठी मोहिले यांनी उपकंत्राटदार (तक्रारदार) यांच्याकडे १५ हजार रुपयांची मागणी केली होती. या लाचेबाबत तक्रारदाराने १५ सप्टेंबर रोजी लाचलुचपत प्रतिबंधक विभागाच्या नवी मुंबई कार्यालयात तक्रार केली. याबाबत एसीबीने पडताळणी केल्यानंतर मोहिले यांनी या लाचेबाबत निवृत्त सहाय्यक कार्यकारी अभियंता डेकाटे यांच्याशी बोलणे करण्याविषयी सांगितल्याचे स्पष्ट झाले. पुन्हा एसीबीने या लाचेबाबत पडताळणी केली. यामध्ये डेकाटे यांनी मोहिले यांनी सांगितल्यानुसार १५ हजारांची लाच कंत्राटदाराकडे मागितल्याचे निष्पन्न झाले. त्यानंतर एसीबीने शुक्रवारी सायंकाळी नवीन पनवेलमधील सिडको कार्यालयातच सापळा लावत १५ हजारांची लाच घेताना डेकाटे यांना पकडले. नंतर मोहिले यांना याच कार्यालयातून ताब्यात घेण्यात आले.