व्यसनमुक्ती केंद्रात संशयास्पद मृत्यू

म. टा. वृत्तसेवा, ठाणे

नवी मुंबईतील उलवे येथील व्यसनमुक्ती केंद्रात ठाण्यातील एका व्यक्तीचा संशयास्पद मृत्यू झाल्याने खळबळ उडाली आहे. गंभीर बाब म्हणजे या मृत्यूबाबत स्थानिक पोलिस ठाण्याला माहिती देण्यात आली नव्हती. शिवाय, शवविच्छेदन न करता व्यसनमुक्ती केंद्र चालकाने हा मृतदेह थेट या व्यक्तीच्या घरी रुग्णवाहिकेमधून पाठवला. मृतदेहावर एकापेक्षा अधिक इजा असून ही हत्या असल्याचा आरोप मृताच्या नातेवाईकांनी केला आहे. या प्रकरणी नौपाडा पोलिस ठाण्यात अकस्मिक मृत्यूची नोंद करण्यात आली असून हे प्रकरण एनआरआय सागरी पोलिस ठाण्यात वर्ग करण्यात आले आहे.

चरईतील आनंद व्हिला इमारतीत राहणारे गजानन काशिनाथ चौधरी यांना दारूचे व्यसन असल्याने त्यांना नवी मुंबईतील उलवा गावातील श्री स्वामी सेवा संस्था संचालित व्यसनमुक्ती केंद्रात उपचारासाठी दाखल करण्यात आले होते. सध्या चौधरी कोणतेही काम करत नव्हते. रविवारी त्यांची पत्नी भेटण्यासाठी व्यसनमुक्ती केंद्रात गेल्या होत्या. त्यावेळी चौधरी यांनी जेवणही केले. मला घरी घेऊन चला असे चौधरी पत्नीला म्हणाले. मात्र याठिकाणी काही त्रास आहे का, असे पत्नीने त्यांना विचारल्यानंतर घरी आल्यानंतर सांगतो, असेही ते म्हणाले. इतके बोलणे झाल्यानंतर त्यांची पत्नी तेथून निघाल्या. मात्र अचानक दुसऱ्या दिवशी चौधरी यांचा मृत्यू झाल्याचा फोन व्यसनमुक्ती केंद्रातून आल्यानंतर कुटुंबीयांना धक्का बसला.

व्यसनमुक्ती केंद्र चालकाचे नेरूळला कार्यालय असून चौधरी यांच्या नातेवाईकांना येथे बोलावले. नातेवाईक नेरूळला गेल्यानंतर गजानन यांचा मृत्यू हृदयविकाराने झाल्याचे त्यांना सांगितले. सोमवारी दुपारीच त्यांचा मृतदेह ठाण्यातील घरी आणण्यात आला. मात्र शवविच्छेदन केल्याशिवाय मृतदेह ताब्यात घेणार नसल्याचा पवित्रा नातेवाईकांनी घेतला. त्यामुळे मृतदेह सिव्हील रुग्णालयात पाठवण्यात आला. मात्र नंतर तेथून शवविच्छेदनासाठी मुंबईतील जे जे रुग्णालयात पाठवला, अशी माहिती त्यांचे नातेवाईक प्रकाश चौधरी, मधुकर चौधरी या नातेवाईकांनी दिली.