गडकरी रंगायतनमध्ये रंगणार पं. राम मराठे स्मृती संगीत समारोह
म. टा. प्रतिनिधी, ठाणे
गायन, वादन, नृत्य अशा कलांचा मेळ साधणारा ठाणे महापालिका आयोजित पं. राम मराठे स्मृती संगीत समारोह यंदा १९ नोव्हेंबर ते शुक्रवार २३ नोव्हेंबर या कालावधीत रंगणार आहे. ठाण्यातील गडकरी रंगायतन येथे रंगणाऱ्या या महोत्सवात स्थानिक कलाकारांसह अनेक मान्यवरांचे सादरीकरण होणार आहे.
सवाई गंधर्व महोत्सवाशी तुलना केली जाणारा ठाण्यातील पं. राम मराठे संगीत स्मृती समारोहात यंदाही अनेकविध कलाकारांची उपस्थिती असणार आहे. स्थानिक कलाकारांपासून राज्यस्तरीय पुरस्काराने गौरविल्या गेलेल्या कलाकारांचे सादरीकरण रसिकांना ऐकता येणार आहे. यंदाही नृत्य, नाट्य, संगीत अशा विविध कलांची सांगड महोत्सवात घालण्यात आली आहे. समारोहाच्या उद्घाटन सत्रात रात्री साडेआठ वाजता पं. उदयकुमार ध्रुपद यांचे गायन होणार असून रात्री दहा वाजता धनश्री पंडित राय या ठुमरी सादर करणार आहेत. मंगळवारी पहिल्या सत्रात नृत्यांगना वृषाली दाबके यांचे कथक नृत्य सादर होणार असून रात्री दहा वाजता ज्योती खरे यादवार यांचे शास्त्रीय गायन रंगणार आहे. बुधवारी डॉ. अश्विन दळवी यांचे सूरबहार वादन सादर होणार असून दुसऱ्या सत्रात श्रीनिवास जोशी यांचे शास्त्रीय गायन रंगणार आहे. गुरुवारी रूपक पवार आणि निषाद पवार यांचे तबला वादन होणार असून पद्मश्री डॉ. भारती बंधू यांचे सुफी गीताचे सूर रात्री दहा वाजता निनादणार आहेत. शुक्रवारी दुपारी साडेचार वाजता श्यामरंग हा नाट्य, संगीत आणि नृत्य यांचा कलाविष्कार रंगणार आहे. तर रात्री आठ वाजता पं. राम मराठे स्मृती पुरस्कारांचे वितरण केले जाणार आहे. रात्री साडेआठ वाजता त्रिनाद या कार्यक्रमात पं. रूपक कुलकर्णी (बासरी), पं. कैलाश पात्रा (व्हायोलीन) आणि उस्ताद फारुक लतीफ खान (बासरी) यांचा मेळ साधला जाणार आहे.
हा कार्यक्रम रसिकांसाठी विनामूल्य असून नाट्यगृहात कार्यक्रमापूर्वी एक तास हा विनामूल्य प्रवेशिका दिल्या जाणार आहेत.