'तबलिगी जमात'च्या मरकजमधील उपस्थितांमुळे संसर्ग वाढण्याची भीती
या गाड्यांनी केला प्रवास
- दुरांतो एक्स्प्रेस गुंटूर
- ग्रँड ट्रंक एक्स्प्रेस चेन्नई
- तमिळनाडू एक्स्प्रेस चेन्नई
- नवी दिल्ली-रांची राजधानी एक्स्प्रेस
- आंध्र प्रदेश संपर्क क्रांती एक्स्प्रेस
वृत्तसंस्था, नवी दिल्ली
निझामुद्दीन येथे 'तबलिगी जमात'च्या मरकजला हजेरी लावलेल्या प्रतिनिधींनी रेल्वेमार्गे प्रवास केल्याने आता संबंधित गाड्यांतील हजारो प्रवाशांची तपासणी करावी लागणार आहे. १३ ते १९ मार्चदरम्यान धावलेल्या या गाड्यांमधील प्रवाशांचा तपशील रेल्वेकडून तयार करण्यात येत आहे.
प्रत्येक गाडीतून अंदाजे एक हजार ते १२०० प्रवासी प्रवास करतात. त्यातील किती प्रवासी 'तबलिगी जमात'च्या मरकजला उपस्थित होते याबाबतचा नेमका तपशील उपलब्ध झालेला नाही. मात्र, प्रत्येक गाडीतील प्रवासी आणि कर्मचाऱ्यांवर धोक्याची तलवार टांगत आहे. प्रत्येक जिल्हानिहाय या कार्यक्रमाच्या उपस्थितांची यादी तयार करण्यासाठी रेल्वे मंत्रालयाकडून माहिती देण्यात येत आहे. त्यानंतर संबंधितांचा शोध घेण्यात येणार आहे. संपर्क क्रांती एक्स्प्रेसमधून एका इंडोनेशियाच्या नागरिकाने प्रवास केला होता. तर राजधानी एक्स्प्रेसमधून ६० प्रवाशांनी प्रवास केला. त्यातील एक मलेशियाच्या महिलेचा समावेश आहे. हे दोघेही करोनाबाधित आहेत. २३ प्रवाशांसह प्रवास केलेली झारखंडमधील एक महिलाही करोनाबाधित आढळली आहे. दुरांतो एक्स्प्रेसने प्रवास केलेले दोघे, ग्रँड ट्रंक एक्स्प्रेसमधील दोघे आणि तामिळनाडू एक्स्प्रेसमधील काहीजण बाधित असल्याचे आढळले आहे.